23.2 C
Hakha
Saturday, February 29, 2020
More

    President Trump nih Myanmar cu US tlawn khammi cazin ah telh a timh

    Follow Us

    99,932FansLike
    441SubscribersSubscribe

    Ṭial Tharmi

    - Advertisement -

    US President Donald Trump acozah nih US tlawn khammi cazin ah ram 7 telh chap ‘a timh’ hna i Myanmar aa tel ve, tiah cazin a hmumi cozah rianṭuan pawl nih an chim.

    Kham chap ‘timhmi’ ram 7 hna cu;

    • Myanmar,
    • Belarus,
    • Eritrea,
    • Kyrgyzstan,
    • Nigeria,
    • Sudan le
    • Tanzania ram hna an si. Nain, an rammi dihlak in kham loin chawlehnak visa le tlawnnak visa, tbk., visa phun in kham an si te men lai, tiah an chim.

    Ram cheukhat cu visa lottery program zongah i tel kho lo dingin kham an si te kho men.

    Mah hi fehter asi rih lo, ‘mah ram le mah ram hi cu kham an hau hme maw?’ tiah atu hi White House (President Office) rianṭuan pawl an i al len rih ko.

    Thawngpang fiang cu hmai zarh Nikhatni ah zapi theih in thanh an timh, tiah Wall Street Journal nih a phuan.

    Donald Trump nih President ṭuan a thok ni 7nak ah muslim ram 7 cu US tlawn a rak kham colh hna, nain US rampumpi biaceihzung nih a rak hnonpiak caah a khammi ram pawl a thlen i March 2017 ah avoi 2nak khamnak a tuah ṭhan. ‘Muslim biaknak namneh asi rih ko’ tiin biaceihzung nih a hnonpiak hoi.

    Avoi 3nak a remh ṭhan i September 2017 ah khamnak thawng a thanh ṭhan. Biaceihzung ah chuahpi asi hnu June 2018 ah biaceihtu 9 an umnak biaceihzung sangbik Supreme Court ah vote 5-4 in an cohlan piak.

    Iran, Libya, Somalia, Syria, Yemen le North Korea rammi pawl le Venezuela cozah rianṭuan pawl cu atutiang kum 3 chung US tlawn a kham cang hna. Cutin khammi cazin ahcun acunglei ka langhtermi Myanmar le ramdang 6 telh a timh hna hi si.

    Atu lio a khammi ram 7 hi cu muslim tam deuhnak ram lawngte an si. Kham chap a timhmi Myanmar le ramdang pawl hi cu muslim tam deuhnak ram an si leemlo nain, US ah visa thih hnu tiang um a hmang deuhmi ram pawl an si, tiah Lahwahkah (DHS) cazin nih a langhter.

    2018 chungah business le visitor visa in US a tlawngmi Eritrea rammi 24% cu visa thih hnu tiang an um, Nigeria rammi 15% le Sudan rammi 12% zong mah ṭhiam. Zei ruang dah Myanmar kham a timh ve ti cu hngalh asi rih lo.

    Trump acozah nih cun, cazin ah telhmi ram pawl nih hin US ah tlawn aa thawhmi an rammi pawl ṭha tein an check hna lo caah US ah ralhrang thahnawnnak um lo dingin kan i runvenmi si, ati.

    Charhchan: Wall Street Journal, New York Times le Politico

    Trump kai hnu in India le Malaysia taang Chinmi pawl US kal a fawi ti lo. Atu hi bantukin Myanmar rammi US tlawn kham a timh rih hna tikah Kawlram um Chinmi zong US tlawn a fawi ti lo kho men.

    Myanmar mipi kham loin ralkap bawi pawl lawng kham hna sehlaw ṭha hnga. Zapi sin thawngthanhnak an tuah tikah fiang tein an chimte lai i kan update ve te lai.

    Tu kum November thimnak ah Trump a kai rih ahcun Malaysia le India um Chinmi pawl caah 2024 tiang US kal a har chin lengmang lai tinak asi.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.