22.2 C
Hakha
Monday, November 18, 2019
More

    President Trump nih a chuahkehnak New York state cu Florida ah a chuahtak

    Follow Us

    99,184FansLike
    135SubscribersSubscribe

    Ṭial Tharmi

    Facebook nih fake account 5.4 billions hrawng a thah

    Facebook nih, "tu kum chungah fake account 5.4 billions hrawng kan thah i, ngakchia hremnak le mahlemah thahnawnnak an tarmi million tampi...
    - Advertisement -

    New York state ah a chuakmi US President Donald Trump nih Nilini zaan ah, “New York state um ramkheltu pawl nih an ka nehsawh tuk ruangah New York state ka chuahtak lai…,” tiin Twitter ah thawng a thanh.

    Biaceihzung cazin kan zoh tikah a rak chuahtak taktak ko. Florida state i Palm Beach khua um a inn Mar-a-Lago Club hi zungzal a umnak inn asi cang tiin Palm Beach County Circuit Biaceihzung cazin ah kan hmuh, tiah US tadinca Fox59 nih a thanh.

    Zungzal a umnak inn address cu September thla dongh lai ahkhan biaceihzung ah atu bantukin a thlen hi si. A nupi Melania Trump nih October thla ah a thlen colh ve, tiah Fox59 nih ati.

    “1600 Pennsylvania Avenue um White House hi ka hung uar ngai, i tu hnu kum 5 chung cu America Kan Liannganter Ṭhan rih lai caah kahin ka um rih ko men lai, nain kan chungkhar ning Palm Beach, Florida ah zungzal in kan um thai cang lai,” tiah Trump nih a Twitter ah a ṭial.

    Florida state i Palm Beach khua um Trump inn Mar-a-Lago

    “New York le New York um mipi hi ka sunhsak tukmi nan si, i hmailei zongah kan sunhsak peng ko hna lai, nain vanchiat ah, kum fatin New York khuapi, sang le state ngunkhuai (tax) tangka million tampi ka pek peng buin, khuapi le state ramkheltu pawl nih ṭha lo tukin an ka tuah.

    “Cheukhat lebang cu keimah nak in an neek deuh hna. New York chuahtak hi ka duh ve hrim lo, nain a donghnak ahcun chuahtak hi kan dihlak caah a ṭhabik si ko lai. President dirhmun in, New York le uar um tukmi New York mipi cu ka bawmh peng ko hna lai. Ka thinlung ah a taang peng ko lai,” tiah Trump nih ati.

    Biaceihzung catlap ahcun, Trump cu hmasa ah New York City i Manhattan um a inn Trump Tower ah zungzal in a ummi si. Adang a umnak hna cu White House le New Jersey state i Bedminster khua um Trump National Golf Club an si, tiah an ṭial.

    Trump cu President a ṭuan hnu ah amah ngeihmi kohti kun ah ni 239 a ummi telh in a innlo pawl ah ni 307 a um cang, tiah CNN nih a ṭial.

    New York state cozah hruaitu Gov. Andrew Cuomo cu Trump a ṭhialmi kongah a ngaihchia naisai lo.

    “Maw vanṭhat. Donald Trump nih New York state ah ngunkhuai (tax) zong a pe bal hlei lo. Florida, rak i lak ulaw,” tiah zei rello takin ati men.

    Trump le a chungkhar

    President Trump aa ṭhialmi kong cu The New York Times tadinca nih a phuan hmasa cem.

    President Trump he aa naihniam ngaimi pakhat nih, “Trump aa ṭhialnak aruang cu tax (nungkhuai) hrial a duh caah si. Florida state ahcun income tax pek a um lo cu awh,” tiah The New York Times sinah a chim.

    “Cun, Manhattan pengkulh cozah sihni nih tax return kongah taza a cuaimi hrim kha Trump a thinhung tuk,” tiah a chimchih. Sinain, tazacuai a tonmi cu aa ṭhial thawngin zeihmanh aa dang hlei lai lo, tiah zumh asi.

    Taza an cuaimi cu atutiang ahcun Trump duhning in a kal kho lo. Hmai kum ah President Thimnak (Presidential Election) tuah ding asi fawn tikah Trump caah apoi ngai.

    Trump case kong cu New York grand jury ah ap ding asi i Trump nih a kham len nain October thla thok ah biaceihtu nih ‘ap ding’ in bia a khiah ṭhiam. Trump a sihni nih ap lo dingin a nawl colh ve.

    Nawlnak biaceihzung (appeals court) nih a kong ceih rih lo dingin nawl a chuah colh, nain Trump nih a case hi New York grand jury ah ap lo dingin a kham kho lai ti kan zum lo, ati.

    Nawlnak: Kan website chung ca hi website dangah copy piak lo dingin kan in nawl hna.
    Lian
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.