President Trump le Putin an i tong cang lai

President Trump le Putin an i tong cang lai

US President Donald Trump le Russia President Vladimir Putin cu Finland khualipi Helsinki ah tonbiaruahnak an ngei lai. July 16 (Asia caan July 17) ah an i tong lai.

Mi tampi an thinphang – Putin le Trump lawngin suimilaam cheu hrawng an i tong hmasa lai tiah thawng an thanh caah minung tampi an lungrethei.

Putin cu Russia sungtthoh zong a rak ttuan balmi a si bang milem a thiam in a fimzer tuk. Donald Trump cu ramkhel lei zeihmanh a ttuan balmi a si lo pinah ‘keimah’ tiin aa porhlaw sawsawhmi, lemsoi fawi phun a si.

Cucaah, innkhan chungah anmah 2 lawngin suimilaam cheu hrawng bia an i ruah tikah Putin nih a miak dih lai ti an phang. Cun, anmah 2 lawngin bia an i ruah tikah zei kong dah an ceih lai ti zong mipi an thinphang ngai.

Mi tampi nih cun anmah 2 lawngin i ton hi um hlah seh ti an duh ngai nain Trump nih a duh lo cang cun zei bang ti awk ttha lo.

Putin nih US Presidents 3 a rak ton bal cang hna nain atu bantukin ‘anmah 2 te lawngin innkhaan chungah bia i ruah’ hi a rak um bal lo.

Mah hnu ah, anmah ruahnak petu pawl telh in biaruahnak an ngei tthan lai.

Trump cu Ramdang Vuanci Mike Pompeo, White House rianttuan lutlai John F. Kelly le Ram Himnak Ruahnak Petu John R. Bolton hna nih an telpi lai.

Zei kong dah an ceih lai?

An i tonnak dingah suimilaam tlawmpal lawng aa duh cang nain an i ceih ding kong cu hohmanh nih hngalh a si lo. President Trump nih cun “zei pipa kaa ruahchan lo, Russia he kan i rem le kan  i dawt kha ka duhmi si ko…” a ti.

Nain, Russia nih US sin in ngah a duhmi a tam ngai – US nih Russia chawlehnak a phihpiakmi tampi a um. Mah ruangah Russia sipuazi a tla tuk. Mah hi US nih kan honpiak seh ti a duh.

Cun, Russia President Putin nih US hi zei lei paoh (ralkap thazaang, technology, chawlehnak, tbk.) in lonh dih a duh. Russia hi US lonh in vawlei cungah huhman ngei bik si a duh.

2016 US Thimnak tuah lio zongah Democratic party email a umnak computer cu Russia nih a hack i email an rak i kuatmi pawl cu vawleipi theih in a phuan caah Hillary Clinton a mualpho. US ram states 20 hrawng i vote thlaknak seh zong a hack dih pinah social media in US mipi tampi a hlen hna.

Russia nih US hi tei aa zuam pengmi a si caah tutan ah ton a duhmi zong hi US sin in ngah a duhmi thil tampi a um ti a fiang.

Cucaah, Trump le Putin lawngin biaruahnak tuah ding cu US mipi an lungtling lo ngai.

Biaruahnak a dih hnu ah kap 2 thawngthanhnak an tuah te lai i mah tik lawngah zei dah an i ceih ti cu hngalh a si te lai.

Nain, thawngthanh tikah an chim lomi thlithup thil tampi a um lai ti cu a fiang.

| Face The Nation, CNN le Washington Post

Leave a Reply

Your email address will not be published. Required fields are marked *