US President Donald Trump nih White House in US mipi sinah, Iran nih Iraq um US ralkap sakhan 2 a kahmi kong thawngthanhnak a tuah dihka bak asi. A biapi khun ka timi rianrang in ka rak ṭial. Trump nih Iran kah a tim lo.

Iran missiles ruangah US ralkap a thimi an um lo – Nithumni zingka dei hlan 1:45am in 2:45am kar ah Iran nih missiles zun 22 in Iraq um US vanlawng ralkap sakhan 2; al-Assad sakhan le Erbil sakhan a kah hna. al-Assad sakhan ah missiles zun 17 a tla i zun 2 an puak lo. Erbil sakhan ah missiles zun 5 an tla.

President Trump nih “zahan zaan ah Iran cozah nih a kan kahmi ruangah American pakhat hmanh hliamh an tong lo. Hliam tongmi le a thimi an um lo. Kan ralkap sakhan zong tlawmpal te lawng an rawk,” tiah a chim.

Iran nih a lungṭhulhmi alo – President Trump nih, “US ralkap cu zeipaoh tuah dingin timhcia an si, nain atu cu Iran nih a lungṭhulhmi alo.

“Iran nih a lungtthulhmi alo, mah hi kap hnih 2 caah thil ṭha ngai asi i vawleipi caah thil ṭha tuk asi,” tiah a chim.

Phun dangin chim ahcun Trump nih Iran kah a tim lo.

Iran ralbawi Soleimani kha American pawl thah a timh hna nain kan kham – US nih kan hnu zarh ah a thahmi Iran ralbawi Qassem Soleimani cu President Trump nih ‘vawlei cung ralhrang number 1 asi’ ati.

“Hezbollah telh in ralhrang ralkap pawl tinṭan a pek hna, ralhrang cu mipi thah a fial hna. Middle East ah thisen luang dihlak in ral a thawhter. US ralkap thong tampi a thah hna. Lamkam hna ah bomb a hmenh i minung tamtuk a thah hna.

“Naite i Iraq um US ralkap pawl a kap i US ralkap 4 a hliamh i 1 a thattu pawl zong kha Soleimani nih a fialmi hna an si. Iraq khualipi Baghdad um US Tanzung mei khangtu zong kha amah nih a fialmi hna an si. Nai hrawng kha American umnak pawl ah thahnawnnak tuah ai tim, nain kan kham,” tiah a chim.

Trump nih Iran chawleh phihkhamnak a tuah – “US nih Iran cozah chawleh phihkhamnak kan tuah colh lai. Iran nih a zia a thlen hlan paoh cu mah phihkhamnak fak taktak pawl hi kan chiah peng lai.

“Nai thla tlawmpal chung lawng hmanh ah, Iran nih ramkip rili ah tilawng a tlaih hna, Saudi Arabia a kah, American drone 2 a kah thlak hna,” tiah President Trump nih a chim.

A chimmi dang a tawinak;

  • Middle East zinan kan herh lo. President ka tuan hnu in US cu vawlei cungah zinan (oil) le natural gas tambik a chuahtu kan si. Middle East zinan kan herh lo.
  • Keimah US President ka si chung paoh cu Iran nih nuclear hriamnam a ngei kho lai lo. Iran he nuclear lungtlinnak ser dingin kan dihlak tuan ti hna usih.
  • A donghnak ah, Iran hruaitu le mipi hna, hmailei khuasaktintuknak ṭha ngei uh ti kan in duhpiak hna. Nan ram ah ṭhanchonak um sehlaw vawlei cung ramkip he aa dawremmi si uh ti kan in duhpiak hna, tiin Trump nih minutes 10 chung a thawngthanhnak a donghter.

Zei ruang dah Iran missiles in US ralkap an thih lo

Min langhter a duh lomi US ramdang vuanci zung riantuan pakhat nih, “Iran nih US ralkap sakhan hi aa ngenhter hramhrammi si lai ti ka zumh. US ralkap tamtuk an thih cun US nih fak tukin a kan lehrulh lai ti a phang tiah ka zumh,” tiah a chim.

Adang US cozah riantuan pawl le congressmen/women pawl zong nih cutin an chim pah cio.

President Trump nih “Iran nih a lungtthulhmi alo” a timi zong cu mah cu si dawh asi.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...