US President hlun Donald Trump nih, “Hmai kum thokka ah Truth Social timi social media ka dirh lai,” tiah thawng a thanh.
President hlun Trump a ṭanhtu pawl nih January 6 ah US Hluttaw an rak baoh i minung 5 thihnak an chuahpi, cucaah Trump cu ‘social media in buainnak na chuahter’ tiah social media minthang Facebook, Twitter, Youtube, tbk pawl nih hmang kho ti lo dingin an kham/ban i mipi nih online ah hmuh khawh asi ti lo. Mah ruangah amah tein Truth Social tiin social media dirh a timhnak hi si.
“Truth Social ah ka ruahmi pawl tar le tech company tumtlang pawl doh lai kaa ngaih tukk,” tiah Truth Social dirh a timhnak kong cu a chim.
Trump nih, “Truth Social cu November thla ah hme deuh in onnak kan tuah lai i sawmmi minung pawl lawng nih download khawh dingin kan tuah lai.
“Mipi (ahopaoh) nih hman khawh dingin cun hmai kum thokka ah kan tuah te lai,” ati.
Truth Social cu Trump Media & Technology Group le Digital World Acquisition Corp company nih an tlaih lai i hnu ahcun mipi nih share cawk khawh dingin ‘public company’ ah an tuah te lai.
Truth Social cu hman a ngah tikah hman khawh colh na duh ahcun TruthSocial.com hi hmet law na min le email pek chung khawh asi. Apple App Store zongah order chung khawh asi.
Facebook, Twitter le Google cu Trump nih, “Ka kaa nan ka phih. US Phunghram nih zalong tein chimrelnak nawl (freedom of speech) aa ka pekmi nan buar…,” tiin July thla ah taza a rak cuai hna nain atutiang ceihpiak asi rih lo, nain a sung te lai tiah zumh asi.
