14.7 C
Hakha
Wednesday, October 20, 2021
- Advertisement -

Ṭial Tharmi

President Biden: US ah COVID-19 raikhamsi 200 million kan chunh cang hna

US President Joe Biden nih, “President ka ṭuan ni 100 chungah COVID-19 raikhamsi 200 million kan chunh hna lai ka rak timi cu kan tlinh cang,” tiah lunglawmhnak thawng a thanh.

Biden cu President a tuannak ni 92 lawng asi rih.

200 million a timi hi ‘minung’ si loin ‘raikhamsi’ asi. US ah an hmanmi raikhamsi cu Pfizer, Moderna le Johnson&Johnson asi. Pfizer le Moderna cu voi 2 chunh a haumi si i Johnson&Johnson cu voi 1 lawng chunh a haumi si. Tam deuh cu Pfizer le Moderna an i chun. Voi 2 aa chun cangmi an um bantukin voi 1 lawng aa chun rihmi an um caah a minung in cun 134 million hrawng lawng an chunh rih hna, tiah CDC nih a langhter.

US ram ahcun minung 331 million hrawng an um caah acheu dengmang (40%) hrawng an chunh cang hna tinak asi.

“US mipi dihlak (330 million hrawng) raikhamsi chunh dih colh kan i zuam lai. Riangngeitu (boss) pawl nih nan rianṭuan pawl kha raikhamsi chunh an duh ahcun lahkhah tan loin rian dinh caan pe hna uh, ati.

“Rianṭuantu 500 tang lawng a ngeimi company pawl cu nan rianṭuantu lahkhah tan loin raikhamsi chunh caan nan pek hna ahcun cozah sinah tax nan pekmi kan in khirh bang te hna lai,” ati.

US rammi tampi cu raikhamsi kai chunh ahcun vanchiat ka tong sual lai ti an phan caah an duh lo. Mah ruangah US mipi dihlak chunh a har ngai te lai.

Nain, President Zung (White House) nih, “Raikhamsi a zumtu an karh deuh ngai ko cang,” tiah a thanh.

“Poll kan tuah i kan hnu thla ah raikhamsi chunh ka duh lo a timi chungin 40% cu kan i chun ko men lai an ti cang,” tiah White House biachimtu Pi Jen Pasaki nih a chim.

“November 3 thimnak tuah lio ah Donald Trump vote a pemi tam deuh (71%) zong raikhamsi khoh 1nk an i chunh cang lo hmanh ah chunh an i tim cang,” ati.

COVID-19 raikham si cu ni 20 silole 30 dan in voi 2 chunh asi.

President Biden nih, “July 4 hlan ah COVID-19 pulrai tei dingin kai tinhmi cu atutiang kai tinh ning tein thil a kal thluahmah rih ko. Nain, mipi nih raikhamsi chuh nan i thawh cio lawngah a tlamtling kho lai.

“May le June thla ah minung tampi chunh rih an hau.

“Pulrai kong cu a ra laimi zarh tlawmpal chungah thawng kan thanh ṭhan te hna lai,” ati.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -