BILLY GRAHAM _ N.G tiah langhtermi pa nih, “Pathian nih a ngaihthiam khawh lo ding in sual hi zei tluk ngan dah a si a hau? A ri ka lonh kho men ko nain ka sual tuahmi hi an ngan hringhran, fahnak ka pekmi minung hi an tam tuk,” tiah a rak hal.
Billy Graham nih, “Pathian nih a ngaihthiam khawh lomi sual pakhat cu a ngaihthiamnak cohlan duh lo hi a si,” tiin a leh.
“Zei bantuk minung kan si hmanh ah, zei bantuk thil kan tuah hmanh ah, Pathian nih kan ngaihthiam hna lai tiah bia a kan kamh. Zumhnak le sual ngaihchihnak in amah lei kan i mer ahcun a kan ngaihthiam hirhiar lai,” a ti.
“Pakhatkhat nih fahnak maw a siah kan si loning in a kan thangchiat tikah philh kha kan i harh tuk, ngaihthiam kan i harh.”
“Minung nih sual lianngan ngaihthiam le philh kan i harh nain Pathian cu a si ve lo.”
“A si e, kan sualnak nih a thin a hun/linhter ko. Minung sinah lungfahnak kan pekmi nakin Pathian kan pekmi lungfahnak hi a ngan deuh, an thuk deuh.”
“Mah cu a si ko nain a kan dawt thiam, kan sualzia kan hngalh i zumhnak le ngaihchihnak in amah kan fuhpanh kha a hlam, a duh.”
“Pathian nih kan sual ngaihthiamnak hi biatak lungtak in a laak caah a fapa ngeihchun hmanh kan sual ruang thi ding in a hun thlahnak hi a si.”
Hi bantuk biahalnak hi a ton caan ah Mark 3:28-29 kha a hrilhfiah hna: “Biatakte in kan chimh hna, mi fapa hna sualnak vialte le Pathian cawhdehnak an chimmi zong ngaihthiam an si ko lai. Asinain Thiang Thlarau cawhdehtu cu ngaihthiam an si kho lai lo, zungzal sualphawtnak kha an co ding a si.”
Hika zawn i ‘Thiang Thlarau cawhdeh’ timi hi Jesuh sin kir dingin Thiang Thlarau chimhnak le sawmnak cohlan lo khi a si. ‘Ngaihthiam khawh lo sual’ timi cu Jesuh cohlan cang hnu le cohlang rih lomi nih zei sualnak a va tuah khi a si lo. Thiang Thlarau kong a va chimchiat, zeirello zong khi a si lo. Sual ngaihchih i Jesuh sin kir dingah Thiang Thlarau sawmnak cohlan lo khi a si a ti.
THE CHRISTIANS TODAY
