Chinpa Malaysia Thonginn Ah Ni 14 Chung

Chinpa Malaysia Thonginn Ah Ni 14 Chung

Malaysia ram ah palik tlaih ton a harnak kong theih a duhmi nan um ahcun, ka tuanbia kan chim hna lai.

Laitlang ah tangka kua dingin zaanlei rianttuan ttin hnu ah Imbi ah ka kal. 9pm hrawngah taxi in ka ttin. Taxi mongtu cu India pa a si. Tamil holh in a hawile a chawnh pah lengmang hna.

“Traffic a jam tuk” aa titer i ka duh lo buin lam dangah a pial. Lam ahcun bia kan i al pah len cang. Taxi cu rang tukin a mongh caah zuan awk a ttha lo.

Minutes 8 chung hrawng a ka tlikpi hnu ah a dirter cu a hawile minung 4 nih an rak kan hngah ko. Taxi in ka chuah cangka in an dihlak in an ka velh colh.

A hawile umnak inn pawng (taxi a dirternak pawng) ah an ka kalpi hnu ah ka tangka bawm le phone an ka chuh. Inn a rawk cangmi tung ah an ka hren. Ka kedanh kaa cawk tharmi le ka taisawm an ka phoihpiak, an i lak.

Sau lakte an ka velh i ka celh ti lo hnu ah palik an chawnh hna. “Kan inn ah mifir pa a lut i kan tlaih…” tiin an hlen hna.

Palik cu an rung phan i an ka tlaih colh. Pawngkam cu hman an thlak i fir case in Dang Wangi Palik Sakhan thonginn ah an ka thlak. Zeitluk ka chim len zongah an ka ngaihpiak duh lo, an rammi mi hrokhrawl pawl chimmi lawng an ngaih.

A thaizing ah, tlaih a rak tong vemi Laimi pawl he kan i tong, minung pakhat nih Nokia phone a chiami te a rak ngeih (thonginn chungah phone luhpi a ngah lo, kan angki le bawngbi zong a kan phoihter dih i thonginn angki le bawngbi a kan hrukter nain zeitin dek a rak luhpi khawh).

Mah phone in cun zaan 10pm ah ka umnak inn i minung pakhat ka chawnh. Nain, mah ni cu ahohmanh nih an rung ka veh lo i ka lungrethei tuk.

Dang Wangi Palik sakhan ah an rak ra ko nain tonnak nawl an rak pe duh hna lo, a ka tlaitu palik kha Salak Selatan Palik Sakhan i palik pawl an rak si caah a tlaitu pa sinah tonnak nawl va hal hmasa ulaw amah nih nawl peknak ca an ttialpiak hna hnu lawngah nan ton khawh lai an rak ti hna. 12am ah Salak Selatan Palik Sakhan cu an va phan i tonnak ca cu an lak khawh nain, Dang Wangi ahcun 12am hnu ah thongtla ton a ngah ti lo.

A thaizing 10am hrawngah Dang Wangi Palik Sakhan Thonginn (lockup) ahcun an rung ka ton, kaa lawmh tuknak ah ka mitthli tla. Ka chuahka in avoi 1nk bik thong ka tlak si caah ka chungle nih an ka ton khawh lo ahcun… tiin khua zaza ka rak ruat i ka lungrethei tuk.

Mah hnu lawng ahcun nizaan i an ka ton khawh lonak aruang cu ka hngalh.

A ka tlaitu palik pa sin i tonnak ca an lak lio ah, “mi inn ah fir dingin a luh caah fir case in kan tlaihmi a si…” a rak ti hna caah an lungre a rak thei tuk. Taxi mong le a hawile nih damiah an ka ttaihmi a sinak kong cu ka chimh hna.

Mah ni zaanlei ahcun a ka tlaitu palik pa cu Salak Selatan Sakhan ah an va ton tthan i thil sining cu an va chimh nain, “inn ngeitu kan hal hna i thil sining ttha tein kan hlat hnu ah mifir a si tiin Tazacuaitu Cozah Sihni (DPP) Zung ah kan ap cang…” a rak ti hna.

A thaizing ah, thonginn ah an ra i thil sining cu an ka chimh tthan. Ka lungrawk tuk. Mah lio cu 2016 ah a si i kum 19 ka rak si.

Ka chungle nih chuahnak lam an kawl len, Chin Ralzaam Bu (CRC) sinah bawmh an hal i voi tampi palik an ton hna nain fir case a si caah zeihmanh tuah khawh a si ti lo. Dang Wangi Thong ah ni 14 chiah in Biaceih Zung ah chuahpi ding ka si cang.

Biaceih Zung nih “a sual ko..” a ti ding le thonginnpi ah an ka kuat ding a fiang cang. Ka caah caan a dong cang ti tlukin ka rak tuar.

Vantthat ah, CRC nih sihni an ka hlanpiak, sihni cu CRC he aa theimi an si caah man fawi te RM1,000 in an hlan khawh (ni 1 ca lawng a si ve).

Sihni nih ka case kong cu a hlat hnu ah, “an chimmi paoh kha a si ko na ti dih lai i keimah nih biaceihtu cu thongthlak loin tangka liam dingin kan nawlpiak lai, na case hi upadi ning ahcun a tambik RM2,000 tiang lawng liamter a si. Mah nak hmanh in a tlawm deuhte kho men, biaceihtu nawl a si te lai…” a ka ti.

“Ka fir bak lo, taxi mong le a hawile nih…” ti ahcun Thonginnpi ah kuat in a thlathla a rauh hnu ah biaceih zungah chuah tthan lengmang ding khi a si. Taxi mongpa le a hawile zong biaceih zung ah an auh hna lai i cutin sau tuk a buai ding a si.

Cucaah, sihni pa nih a ka chimhmi cu ‘ee’ ka ti. Sihni hlannak le tangka liam ding fonh RM3,000 hmanh cu ka rak ngei lo. Ka chungle nih Khrihfabu sinah do an ka cawipiak.

Ni 14 hnu ah biaceih zungah an ka chuahpi. Sihni nih a ka chimh bantuk cun tazacuaitu sihni pawl nih ka case kong an chimmi (mifir a si…an ka timi) vialte cu ‘a dik ko’ ka ti dih. Biaceihtu nih RM2,000 a ka liamter i cutin ka chuak.

Nihin tiang Malaysia cozah cazin ahcun “mifir” ka si peng ko. Mah kong ka ruah ahcun a thar in ka lungfak peng.

Ni 14 chung Dang Wangi Sakhan thonginn ah an ka chiah lio cu rawl ttha tein a kan pe lo. Meh loin buh tlang 1 le ti hrai tan te a kan pek. Mah hmanh cu African pawl nih a kan chuh pah lengmang.

Rawl ei huaha lo, pawttam takin kan rak um. Ti kholhnak a umlo. Ni 3 chung kholh loin ka um cu ka thlan a chuah tikah taxi mong le a hawile nih an ka velhnak ka thi le ceet kaa nahmi pawl kha a thak dih, ruahpi sur caan i inn cungin a tlami tisor lakah kaa kholh.

Rai nih a ka fenh i ka thi deng. Ihphah le puan zong umlo, rawl umlo, ti umlo. Mah lak i zawt a har ning. Minung kan tamtuk fawn i hna a chet tuk.

Mah lio i ka nulepa ka ngaih tuk hna ning kha cu… chunzaan in anmah lawngte ka mitthlam ah an cuang.

Mah lio i ka lungfah bikmi cu Kawlram ah ka rak chuahmi hi a si. Ram ttha ah rak chuak ninglaw hi bantuk hi ka tong hnga lo… ahopaoh kan nu paw chungin kan chuah ahcun a sual lo lawngte kan si ko… mizei hi dah US ah an chuak i mizei hi dah Kawlram ah kan chuak.

Minung ciocio kan chuahnak ram te aa dan ruangah hi tluk kan tuar fah hi… zei bantuk sualnak ko hen ka tuah i mah hi kaa huah… adang vial an chuahnak hmun te aa dan ruangah an nun a fawi ning.. tiin ka ngaih a rak chia tuk. Kawlram a hrawktu Ralkap cung hrim ah ka lungfah ning hi hmurka in chim khawh ding a si lo.

Kha tluk tuksapur harnak chungin a ka chuahtu ka chungle le CRC rianttuan nan cungah kaa lawm tuk. Pathian nih nan techin fapar chan tiang thluachuah in pe ko hna seh.

Cattialtu: Siang Lian Cung

Thong na tla bal ve maw? Midang sinah na tuanbia hrawmh na duh ahcun email lian@thechinexpress.com ah na tuanbia kuat khawh a si.

Be the first to comment

Leave a Reply

Your email address will not be published.


*