Kenya ram ah, pastor pa nih biakinn chung pumh lio ah a nupi a thah hnu ah, pulpit cungah amah tein a hrom aa hleh ve. Aa pummi mipi cu tuksapur in an um, tiah khua palek nih an chim.
Mombasa khua um Ground for God’s Gospel Church i assistant pastor Elijah Misiko cu, hmaitlang ṭhutden in a tho i pulpit cung ah a ṭhumi a nupi senior pastor Ann Mughoi cu nam in a sawh, tiah palek nih an chim.
“A nupi biathli chimh a duh rua ti awk khin, thlacam lio ah a nupi lei ah a kal,” tiah Mombasa khua palek bawi changtu Julius Kiragu nih a chim.
“Cun namte pakhat aa chuah i a nupi cu voi 2 a sawh. A thi cang tiin a ruah. Mah hnu ah amah tein a paw ah voi 3 aa sawh i a hrom aa hleh,” ati.
Misiko cu a hmun ah a thi. A nupi cu khua chung sizung an phakpi hnu suimilam tlawmpal ah a thi.
Nuva hna hi biakinn ngeitu le hruaitu sinak i cuh in bia an i alnak caan a sau ngai cang, tiah palek bawi changtu Kiragu nih a chim.
2017 ah, ka vapa nih thah aa ka timh tiin a nupi nih palek sinah a report ruangah Misiko cu palek nih an rak tlaih. ‘A nupi chimmi hi a diklo’ tiin a thaizing ah Misiko cu an thlah.
Nuva hna hi fa 4 an ngei nain 2017 ah bia an i al hnu cun inn dang veve ah an um. “Biakinn ngeitu sinak i cuh in bia an al hnu cun a nupi nih inn dangah a um tak peng,” tiah Kiragu nih a chim.
“Biakinn ngeitu si an i cuhnak kong cu biakinn hruaitu pawl sin zongah report an rak tuah nain lungtlinnak an hmu kho lo.
“Misiko nih amah tein i thah a duhnak kong cu cahmai 17 khat in a ṭial i a chiahta. Mah ca chung ahcun, biakinn hi ka nupi min lawngin kan rak dirhmi asi i hnu ah ka nupi nih amah ta lawng si dingin thlen a timh ati,” tiah palek nih an chim. — CNN
Theihtlei: Kenya cu Africa leiṭhen (continent) ah a ummi ram asi i minung 50 million an um. US President hlun Barack Obama i apa ram asi.
