Paraguay nih Jerusalem in Tel Aviv ah tanzung a tthial tthan caah Israel a thinhung tuk

Paraguay nih Jerusalem in Tel Aviv ah tanzung a tthial tthan caah Israel a thinhung tuk

Israel ram i Tel Aviv khuapi ah a ummi Paraguay tanzung cu May 21 ahkhan Paraguay President nih Jerusalem ah a tthial caah Israel aa rak lawm tuk nain, thla 3 hnu, nizaan ah Paraguay president thar Mario Abdo Benítez nih Tel Aviv ah a tthial tthan.

Cucaah, Israel Cozah Lutlai (PM) Benjamin Netanyahu a thinhung tuk i, “Paraguay ah a ummi Israel tanzung kan khar lai,” tiah thawng a thanh colh.

US President Donald Trump nih ‘Jerusalem cu Israel khualipi a si’ tiah a cohlan piak i US tanzung zong Tel Aviv in Jerusalem ah a tthial hnu, May thla ah Paraguay President hlun Horacio Cartes nih ‘kan tanzung zong Jerusalem ah kan tthial ve lai,” tiin thawng a rak thanh i an tthial taktak.

Jerusalem ah Paraguay tanzung an tthialmi honnak cu Paraguay President hlun Horacio Cartes pumpak bak nih a rak tuah i Israel PM Benjamin Netanyahu he lunglawmhnak bia an rak chim len.

Zei ruang dah Jerusalem in Tel Aviv ah an tthial tthan

Paraguay President hlun nih Jerusalem ah a rak tthial lio ahhin atu hi President thar pa Mario Abdo Benítez hi a lung a rak tling lo. Cucaah amah nih president a tlaih bakin Tel Aviv ah a tthial tthan hi si.

Mario Abdo Benítez hi kan hnu thla ah president an thim tharmi si.

“Jerusalem i cuhnak kong ahhin tlukruannak a um i Middel East ah zungzal daihnak a lennak hnga Paraguay nih kan tuah khawhmi tuah ve kan duh caah Tel Aviv ah kan tanzung kan tthial than hi si,” tiah Paraguay ramdang vuanci Luis Alberto Castiglioni nih a chim.

Mah cangka in, Israel PM Benjamin Netanyahu nih ‘Paraguay i Israel tanzung kan khar lai, kan palai zong Israel ah kan auh lai. Kan ram 2 pehtlaihnak hrawh dingin Paraguay nih biachiahnak a tuahmi hi Israel nih kan i fahsak bak,” tiah a leh colh.

Israel le Palestine buainak aa thok ning – video

Jerusalem cu Israel le Palestine nih an i cuhmi khua a si. Israel nih ‘Jerusalem cu a ningpi in kan khualipi a si’ a ti i Palestine nih ‘Jerusalem nichuahlei cu kan khualipi a si’ a ti ve.

Palestine aa lawm tuk. Palestine president Mahmoud Abbas nih, “Paraguay thil tuahmi cungah kan i lawm. Paraguay cozah he i pehtlaihnak caah an ram ah Palestine tanzung kan hon colh lai,” tiah thawng a thanh. — BBC le The Guardian

Leave a Reply

Your email address will not be published. Required fields are marked *