Paletwa ralzaam pawl eiawk an ngei hnik ti lo

- Advertisement -

Paletwa khua i ralzaam camp ah a ummi ralzaam pawl cu bawmhnak an hmuh lo ahcun ni tlawmpal chungah ei awk facang an ngei ti lo kho tiah ralzaam bawmtu bu nih an chim.

Kawl ralkap le Rakhine ralkap AA kar kahdohnak ruangah Paletwa khua ah a zaammi ralzaam hna cu Chin state cozah, World Food Programme telhin mibawmtu bu pawl nih bawmhnak an pek ko hna nain atu hi facang an ngei ti hnik lo.

Ralzaam bawmtu bu chungtel U Za Ni nih, “Atu hi ralzaam hna nih an herh bikmi cu eicawk facang a si. WFP nih facang a pekmi hna hi tu thla 20 in cun a dih cang lai.

“Cun, cozah nih a pekmi hna zong atu hi a dih cang. Mibawmtu nih pekmi tangka in facang kan cawk lai ti ahcun a tlawmbik 55,000-60,000 hrawng a si tikah mibawmhnak tangka zong in cawk khawh ding silo” tiah a chim.

Paletwa khua ralzaam camp ah a um vemi U Kyar Hlah Aung nih, “Khua luhchuahnak lam an phih tikah tlunkalnak a har tuk. Chin state cozah nih bawmhnak a kan pek ko nain chungkhar milu a tampi ca ahcun kan i za lo. Facang cawknak tangka kan ngei lo” tiah a chim.

Paletwa peng ah vawlei a him lo pinah Covid-19 zawtnak ruangah Rakhine state he pehtlaihnak lam vialte an phih dih ruangah facang telhin a herhmi thilri kuat/cawk khawh si lo caah harnak an tong.

U Za Ni nih, “Atu hi tlunkal a fawi lo caah ralzaam hna caah dineiawk tawlrelpiak a fawi ding silo. Ramchung, ramleng in mibawmtu nih tangka an hlutmi a um. Cu tangka in cun facang kan cawkpiak hna lai i ni 2-3 ca in kan tawlrel piak hna lai” tiah a chim.

Chin ralzaam bawmtu RRCCI cazin ning ah Paletwa khua ah ralzaam 4,800 leng, Samee khua ah ralzaam 2,900, Miza khuate ah ralzaam 2,000 leng le Seint Sin khuate ah ralzaam 200 hrawng an um. – Khonumthung

Follow US

102,149FansLike
53FollowersFollow
731SubscribersSubscribe

Ṭial Tharmi

Hakha University ah ni 14 chung khumherhmi minung 12 cu an ttinter cang hna

Chin state Covid-19 dohnak bu hruainak in Hakha khua chungah a rak lutmi paoh cu Hakha University ah ni 14 chung khumherh...

Malaysia biaceih zung nih kum 5 a fa pate a that tu nu le a tlangval pa thihdan a pek hna

Tuni ah Penang High Court nih kum 5 a fa pate a rak thattu hringtu nu le a tlangval pa cu hri...

Myanmar National Team ah ai tel mi Valte

Valte hi Kalymyo um Falam mi a si. 2010 kum ah Kalaymyo certual ah kan i hmu. Cu...

Thantlang ah bomb a puak

Thantlang khua, No (1) sang i sizung lam ah a ummi U Kyaw Min Htet a umnak inn ah September 20 zaan...
- Advertisement -