Tu zingka 5am hrawngah Magway ramṭhen Pakokku khua in Chin ramkulh Mindat khua lei ah Kawl Ralkap tank le motor 88 hrawng in an hung kai thluahmah.
Tu zingka 8:15am hrawngah ralkap motor le tank 88 cu Pakokku le Pauk khua kar an phan.
9:10am hrawngah Pauk khua an tan. 9:15am ah Pauk le Mindat khua kar lamṭhen an phan i mi an check len hna.
9:25am ah Mindat khua um Kawl Ralkap pawl motor 1 khat in an i cit i an va don hna.
Mah lio cun, Kyaukhtu khua (Magway ramṭhen) in ral tuknak tank motor 2 cu Laitlang an hung kai thluahmah ve i an va don ve hna.
Lam ah CDF le CNF nih bomb an hmenhmi um kho men tiah bomb hmenhmi kawl pah in duhsah tein Mindat lei an hung kai thluahmah.
Mindat khua chung zongah biatak tein minung an check thluahmah cang hna. Mindat peng Ṭhinchaung khuate le Sankhua khuate karlak zongak Kawl Ralkap 60 leng umhmun an khuar.
Mindat le Matupi kar meng tung 70 pawng zongah Kawl Ralkap pawl nih mi an check hna i king an congh.
Mindat peng cu atu hi nikhua a chia tuk i ruahpi a sur cuahmah.
Hiti ning te cun a ra laimi ni tlawmpal chungah Chin state pumpi ngawt in ral a fak taktak kho men, tiah ruahdamh khawh asi.
Nizaan zong ahkhan Sagaing ramṭhen Kalay lei in Kawl Ralkap motor 55 khat in Laitlang an hung kai i Lumbang khua ah an riak.
CNF headquarters Camp Victoria lak an i tim, tiah a zaammi Kawl Ralkap 2 nih an chim.
Nai ahkhan Kawl Ralkap cozah nih ‘kahdohnak kan ngol chung lai’ tiin thawng a thanh. Nain Kawl Ralkap nih hitin kahdohnak ngol chung dingin thawng a thanh tik ahhin hmun dangah kahdohnak a ngol i hmun dang ummi a ral kha hloh lawlaw dingin fak taktak in a doh tawn. Liamcia caan Rakhine, Kachin le Taang a tuk hna lio zongah hitin kahdohnak ngol dingin thawng a thanh i phu 1 tete in hloh dingin a doh tawn hna.
Sinain, CDF le CNF an thachia seh tiin mangtara taktak in ralkap thazaang a chapmi zong asi kho men ko.
Zei khom si ah, hi bantuk caan ahcun mipi cu asi khawh chungin khual tlawn kan i sum ah ṭha. — Zalen
The Irrawaddy tadinca nih, “Kawl Ralkap nih Nitlakchaklei/Northwest (Magway, Sagaing le Chin) lei ah ralkap 3,000 leng a thlah hna,” tiah October 8 ah a thanh.
Magway le Sagaing ahcun ‘mipi ralkap (PDF le CDF)’ an um tuk lo caah ni tlawmpal an cul luklak i atu hi Laitlang lei ah an lan thluahmah i an dihlak ngawt in Laitlang ah an lut kho men. NUG cozah nih Nithlakchaklei ramṭhen 3 (Magway, Sagaing le Chin ) ralkap hi CNF a uk termi an si caah CNF headquarters phomh lawlaw an timh asi kho men.
