Nupi 39 le fa le tufa 127 a ngeimi Pu Ziona Chana, kum 76 cu Mizoram ah a nunnak liam, tiah Mizoram cozah nih a thanh.
Zionnghaka Chana @Ziona Chana cu Mizoram state Baktawng khuate ah a chungkhar he khuasami asi.
A nupi 39, a fale 94, a fale nupi le an fale ((children, daughter/son in-law, grandchildren and great grandchildren) he cun an chungkhar hi minung 192 hrawng an si.
‘Vawlei Cung Chungkhar Nganbik’ tiin ramdang media nih a konglam an rak ṭial tawn.
June 13, Zarhpini ahkhan thikai le zunthlum zawtnak in sizung ah a nunnak liam.
Mizoram Vuancichoh Pu Zoramthanga nih, “Pu Chana nih a kan liamtak cu kan ngaihchia tuk hringhran. Tantakmi chungkhar dihlak an ngaihchiatnak kan hrawmpi hna,” tiah Twitter ah a thihnak kong a thanh.
“Anmah chungkhar thawngin; Mizoram, Baktawng Tlangnuam cu vawlei cung khualtlawng tampi nih kum fatin an hung tlawn peng,” ati.
Pu Ziona Chana apu hi Khrihfa a rak si nain, kum 1930 hrawngah zapi zumhning he aa dang deuh in nupi tampi ngei ngahmi biaknak (Khrihfa kalsual kan ti hnga maw) a rak dirh. An bu ningin Mizoram, Baktawng Tlangnuam khuate ah an um. Atu cu member 1,700 hrawng an si cang. Pu Ziona Chana a nupi 39 cu an bu member lawngte an si.
An bu ahcun Khrihfa cawnpiaknak an hman, nain Mizoram khrihfa nganbik a simi Presbyterian nih cun Chana biaknak cu Khrihfa phung asi lo an ti.
Pu Ziona Chana cu kum 17 asi ah nupi 1nak a ṭhit. An bu dirhtu apu Chana cu kum 1997 February 27 ah a thih hnu in amah hi hruaitu ah an thim. An bu nih cun “Hotupa (Hruaitu)” tiin an auh i siangpahrang bantukin an hmuh. A caan ahcun kum 1 chungah an bu member nu 10 hna a ṭhit hna.
A thih hlan ah Australia media nih an tlawn hna lio atang video ah zoh khawh si. Video ahcun ‘nupi 38′ a ngei an ti nain adang source pawl nih cun ’39’ an ti.
