Nungak No Tete Nupi Caah An Zuar Hna

Nungak No Tete Nupi Caah An Zuar Hna

Hmursensi i thuh in ihkhun hram ah laam le mirh zuai in selfie i thlak cu vawlei cung khuaza kip um nu paohpaoh nih an tuah cio ko men lai.

Bulgaria ram i Kalaidzhi miphun nungak no tete lawng hi nu vialte lakah a van chia bik an si lai.

Europe leitthen, Bulgaria ram ah a ummi Kalaidzhi miphun cu an dihlak in milu 18,000 hrawng te lawng an si. Nain, an pipu hna nunphung cu nihin tiang an hlaw rih lo.

A caan ahcun an fanule hna cu an voi 1nk an thi rat bakin an duh/lo zongah sianginn an phuahter hna i nupi caah an zuar hna.

An fanule hna cu miphun dang pa sinah an zuar duh ve hna lo, anmah Kalaidzhi miphun pa sin lawngah an zuar hna.

Kum 1 voi 1 pengin nupi zuar caan a um. Kalaidzhi ngaknu tlangval pawl cu hmun 1 ah an i tong hna i khat le khat bia an i ruah hna.

Pa nih a duhmi nu a um ahcun a nulepa nih nu chungkhar an ton hna i a man an ceih. Ngaknu tampi cu an duh lomi pa sinah zuar an tong tawn.

2018 Nupi Zuar Lio – Video

Fanu tampi nih hi bantukin zuar cu an duh lo nain, an nunphung a si i an pipu chan lio in an i tthan pimi a si cang cun ‘al awk ttha lo’ phun in an ruah cio. Nain, duh lomi pa sinah zuar ttih ruangah nulepa sin in a zaammi zong an um ve tawn.

Hlan ahcun nulepa nih an fanu cu tangka tambik a ngeitu pa sinah an rak zuar tawn hna nain, tuchan ahcun cheukhat nulepa cu an ttha ngai cang i an fanu nih a duh hrimhrim lomi pa sin ahcun an zuar tuk ti hna lo.

Mopa nih cun $290 le $350 hrawng in ngaknu cu nupi caah an cawk tawn hna. Nain, a caan ahcun a man fak taktakmi zong an um ve.

A mui aa dawh deuh le a nulepa a tthawngttha deuh paoh an man fak deuh.

An fanule hna cu an virgin lo sual lai ti an phan caah kum no tete in an zuar hna. An fanule an zuar hna tikah an virgin lo ahcun ‘hlawhhlang’ chungkhar tiin an auh hna pinah Kalaidzhi miphun pa ahohmanh nih an caw duh ti hna lo.

Cucaah, ngaknu tam deuh cu kum 13 in 20 karlak ah an zuar tawn hna. Kum 20 cung cu tonglo phun in an hmuh cang hna pinah an man zong a tlawm deuh ngai.

Ka fanu a virgin lo sual lai ti phan ah, nulepa tampi nih cun an fale hna cu zaan ah an vahter hna lo, a riak in lengchuah an sian hna lo. Inn ah an umter peng hna.

Nungak dang bangin nightclub le bar kal zong an sian hna lo. A caan ahcun an ihnak khaan tu ah music an honpiak hna i an laamter tawn hna.

2016 Nupi Zuar Caan – video

‘Ka fanu ka zuar tikah a virgin lo sual lai’ ti hi nulepa hna nih an phan bikmi a si.

Tuchan ahcun an fale hna nih Facebook an hman ve caah pa he lengah an i ton khawh lo zongah Facebook an hmanthlak in aa duhmi an tampi cang.

Fim chan a si bang, nulepa cheukhat zong nih an fale duhnak tuahpiak kha a biapi deuh in an ruah ve cang. Online in aa duhmi hna cu ‘nupi zuar caan’ ah an mihring an i tong, cu tik zongah an i duh taktak ko ahcun an nulepa nih man an ceih i an coter ko hna.

Kalaidzhi ngaknu 90% hrawng cu kum 20 tang an si lio ah nulepa nih an zuar peng hna caah, annih caah cun tinhmi ngeih zong san a tlai lo, tlangval he i duh le tlonlen tti caan zong an ngei lo.

Chuahchan ngei lo taktak khi an si…

Be the first to comment

Leave a Reply

Your email address will not be published.


*