Rammi Lungrualnak Cozah (NUG) biachimtu Dr. Sasa nih cathanh a chuah i “Rammi Lungrualnak Cozah kan dirh hnawhchan bik cu ralkap uknak hrawhnak caah asi,” ati.
Kan tuanbia ah, Myanmar nih kan ram thazaang nganbik pakhat asi vemi – mipi kan i dannak – in dirhmi lungrualnak cozah a ngeih cu atu hi avoi khatnak bik si. Cu i dannak cu Rammi Lungrualnak Cozah i ṭhithruainak ah hmuh khawh asi. Myanmar Caankarlak President a ṭuan ding Vice President U Lashi La hi Kachin hruaitu ṭha asi. Kan Prime Minister hi upatmi Karen hruaitu le Rampumpi Hluttaw Sang hruaitu hlun asi. Kutsih in NUG an hruai lai. Kan cozah vuanci zung kip hruaitu pawl nih an zulh hna lai.
Ramdang he Rianṭuanṭinak Vuanci le Rammi Lungrualnak Cozah aiawh biachimtu dingah an ka fial caah kaa lawm. Mah rian hi toidornak te he ka cohlan.
Rammi Lungrualnak Cozah (NUG) nih biapi bikin kan i tinhmi cu, Myanmar rampumpi khuapi, khuate, khua ngan le hme tiangah kan fale telh in kan mipi hna tuksapur in thahnawnnak a tuahtu zaangfahnak ngeilo, misual, phungninglo ralkap cozah kut in kan mipi hna tuarnak donghter cang ding hi asi. Kan ram rumnak an fir i kan hmailei khuasaktintuknak le ruahchannak tiang hrawh an timh. Nain, mah bia hi kan in kamh hna – an sung lai.
NUG a hrampi cu Myanmar mipi dihlak ralṭhatnak, ṭannak, ruahchannak le lungthlitum hi asi. Hruaitu hna nih miphun, biaknak, chuahkehnak le sining zoh loin mipi dihlak hi unau bantukin kan in zohkhenh hna lai i kan in upat hna lai.
Hi lainawng phungninglo ralkap cozah uknak chiakha chungin kan ram luatternak dingah kan dihlak in rian biapi tuk kan ngei cio lai, cun Myanmar rammi vialte aa tluk tein covo kan ngei dih lai.
Hi a ṭhawngṭhami Myanmar ram mipi kan i dannak le kan ram thazaang a tlin khawhnak hnga, a ra laimi zarh le thla chungah, Rammi Lungrualnak Cozah ah miphun dihlak tlinter kan i zuam lai. Kan unau Rohingya le miphun dihlak caah dinfelnak kan chuahter lai.
Phungninglo ralkap cozah a dotu hna ralṭhatnak, pumpeknak le biachahnak in dirhmi asi caah mah cozah hi a rian ngantuk hringhran. Phungninglo in mipi uknak a kan chuh thokin atutiang ah kan ram miralṭha 700 leng nih democracy caah an nunnak an pek cang. Tuni ah upatnak kan pek hna.
I palh bak hlah uh: Rammi Lungrualnak Cozah cu liamcia ralkap cozah le mipi cozah he aa dang tuk. Mipi thimmi MP, miphun hriamtlai hruaitu hna, ramkhel party hruaitu hna, Rianṭuan Bu, CDM le Sianginn Saya/ma Bu, tbk. zatlang bu hruaitu hna telh in tuni ah kan dirhmi asi. Liamcia caan ah atu tlukin Myanmar kan i lungrual bal lo, Rammi Lungrualnak Cozah nih kan i lungrualnak a langhter.
Kan tei lai.
Atang hmanthlak ah Mirangca in tling tein rel khawh asi.
