Nu Cu Harnak Tuar Ding Ah Hrin An Si

Nu Cu Harnak Tuar Ding Ah Hrin An Si

“Nu cu harnak tuar ding ah hrin an si” tiah vawlei cung minthang Pastor John Piper nih a rak chim.

Nu a neek le zei a rel lo ruang ah siloin, nu hna nih an nun chung an i khinhmi rian a har tukning langhternak caah a chimmi a si.

India mi ka hawipa nih voikhat cu “kan nu nau a pawi i fanu ngei ding kan si ahcun ka hrawhter lai” tiah a ka ti.

Ka lau tuk! Ziah? tiah ka hal. Fanu ka duh lo ruang ah siloin, innchungkhar khuasaknak ah NU an i temhning le an rian a rihning ka ruah tik ah, “keimah chung chuak fanu nih hi bantuk a tuar ve ding ka duh lo” tiah a ka leh!

Khua tampi ka ruat! Zing dai hlan in a tho i pa farual thawh hlan ah rawl a hminh dih tawntu ka NU ka mithlam ah a hunh cuang ve.

Fale zohkhenhnak ah harnak a tuarmi phunphun, rul nih voihnih tiang a cuk nak hmapee hna le lo rian a ttuannak ah a mit aa hrawhmi hna ka mit thlam ah an hung cuang i ka nu dawtnak nih a thar in ka thinlung a hun kheh-khuai, mitthli a luang..

Hawi dang hohmanh um lonak ah kal i fakpi in, va tthah ka duh. Asinain hmun rem a um lo caah kaa sum.

Kha ni chun nitlak, Ka mit kaa chinh poh ah rian hrang a tuannak ah thau can zong a ngei kho bal lomi ka Nu ttang ruh ko kha mit thlam ah an cuang!

Ka fale an cut zat in cun, kaa nuam ve te ko lai, tiah thlan hripi he rian hrang a tuan cuahmah lio caan zong ah, hmai panh tein bia nuam a kan ruah kho pengtu, dawtu ka NU saduhthah zeitik tal ah tlin kho te hnga dik maw…

Pastor Hrambik Lian