Norway simcard company Telenor nih Myanmar a company ‘Telenor Myanmar’ zuar a timh, tiah TMT Finance nih a thanh.
Telenor Myanmar zuarpiaktu dingah Citi company a hlan i a ra laimi zarh chungah cawk duhmi pawl he i tonnak an ngei lai, ati.
Telenor biachimtu nih, “Company zuar biachokvai kong ahcun kan i thlak lai lo,” tiin media sinah a chim. Citi company zong nih zeihmanh a chim duh ve lo.
February 1 ah ralkap nih uknak an fir hnu in Telenor mobile sipuaizi an rengh tuk caah le mipi himnak le nuhrin covo a chiat chin lengmang caah kum 2021 thla 3 chung (Q1) cu kan sung, tiah Telenor nih May thla ah a rak thanh.
Cawk a duhmi Tuluk (China) pawl zong hmai zarh ah i ceih dingin an sawm ve hna, tiah TMT Fiance nih a chim. Ramdang simcard company pawl nih cun cawk an duh ko zongah US le nitlaklei ram pawl nih Myanmar sipuaizi an phihmi nih a hnorsuan khawh men hna, nain Tuluk pawl cu a hnorsuang hna lo kho men.
Myanmar ah sipuaizi a tuah vemi ramdang (Qatar) simcard company Ooredoo zong nih cawk a duh pah ve i tangka kong ruahnak cheutu ai kawl hna lio asi.
Ooredoo cu Reuters media nih a chawn kho lo.
Min langhter a duh lomi mah kong a hngaltu pakhat nih, “TMT Finance nih a thanhmi hi thawngpang dik asi ko,” tiah Reuters media ah a chim.
Myanmar rammi 18.2 million nih Telenor simcard an hman. Myanmar rammi 54 million chungah cheuthum cheukhat bak nih an hmanmi asi.
Telenor cu kum 2014 ah Myanmar ah sipuaizi tuah hram a thok i atu cun Myanmar um ramdang company nganbik lakah aa tel ve cang.
Telenor cu Norway, Sweden, Denmark, Finland, Myanmar, Malaysia (Digi), Pakistan, Bangladesh le Thailand tbk ram 9 lengah simcard sipuaizi a tuah. Ni kum ah Myanmar in a hmuhmi tangka hi vawlei pumpi in a hmuhmi dihlak chungah 7% asi.
