US nih sipuaizi phih chap a timhmi cu North Korea nih ‘fak piin kan lehrulh lai’ ati i ralrin peknak caah missile zun 2 a puah.

North Korea cu liamcia caan i missile a puahmi ruangah US nih sipuaizi phih chap a timh. Cucu North Korea nih ‘kan thinhunnak thil na tuah caah fak piin kan lehrulh lai’ ati i ralrin peknak caah missile zun 2 a puah hi si.

“Missile an puahmi cu North Korea ram nitlaklei rilikam um North Pyongan ramkulh ah asi,” tiah South Korea ralkap bawizik nih a chim.

Japan rili ralkap zong nih, “North Korea nih missile a puah,” tiah thawng a thanh ve.

Missile an puahmi cu Japan sipuaizi hmun pawng rili chungah a tla.

Liamcia kum pawl zongah North Korea nih missile a hneksak lengmang. “Ram pakhat kan si bantukin missile hneksak cu kanmah nawl asi. Kanmah tein kanmah ram ah missile kan hneksak komi rumro US nih sipuaizi a kan phih lengmang caah thinhunnak le huatnak a chuahter,” tiah North Korea nih a chim tawn.

North Korea Ramdang Vuanci nih cozah media KCNA sinah, “North Korea nih nai hrawngah ralkap pawl hriamnam thar a pekmi hna cu kan ram ralkap hi chanthar ralkap ah ser a duh caah si, zei ram hmanh ti hramnak le tlerhnak asi lo,” tiah a chim.

“US nih a kan tlerh le hnorsuan ahcun fak deuh in kan lehrulh lai, kan lehrulh hrimhrim lai,” ati.