Seremban: Nora Anne cu rawlttam in a thimi a si tiah tuni ah Malaysia palek nih mipi sinah an chim.
“Nora cu mibawmtu nih a ruak an hmuh hlan ni 2 silole 3 ahkhan rawlttam in a thi tiin kan zumh,” tiah Negri Sembilan palek bawi Datuk Mohamad Mat Yusop nih tuni ah a chim.
Sibawi te nih Nora ruak cu nizaan zinglei sml 11:45 in zaan sml 9 tiang an zohfel i tlaihhremnak nehnang kan hmulo an ti.
“Nora cu rawlttam in caan sautuk a um ruangah a ril pem/kuai i a thihnak hi a si,” tiah Mat Yusop nih a chimchap.
Nora Anne Quoirin te chungkhar cu Malaysia ah zarh 2 caam dingin an rak tlawn hi a si i, August 4 ahkhan a innkhan chungin a tlau. Malaysia nawl ngeitu nih Nora an kawl ni 10 nak ah a ruak in an hmuh.
Nora (kum 15) cu unau chuak 3 lak ah fa upabik a si. A nu le pa i Ireland le French rammi an si. England ram ah khua an sa. _ NST
