6.4 C
Hakha
Monday, December 9, 2019
More

    NLD Vice Chairman a damlonak nih 2020 Election caah an party thazaang a derter khawh

    Follow Us

    99,419FansLike
    254SubscribersSubscribe

    Ṭial Tharmi

    - Advertisement -

    NLD party vice chairman a simi Mandalay region vuancichoh Dr. Zaw Myint Maung a damlonak nih 2020 Thimnak caah kan party i timhtuahnak thazaang a derter, tiah an party chungtel nih an chim.

    Cozah tlaitu party vice chairman cu October 24 ahkhan Yangon ah party meeting a kai hnu ah Thailand sizung ah aa va piah. Mandalay region Mei Vuanci U Zarni Aung nih vuancichoh Dr. Zaw Myint Maung rian cu lawlawse a kemh chih.

    Zei tik dah a rian a peh ṭhan khawh te lai ti zong hngalh asi rih lo, tiah party chungtel cheukhat nih an chim.

    Dr. Zaw Myint Maung le President U Win Myint hi NLD party hruaitu Pi Aung San Suu Kyi a vorhlei kut an si. Anmah 2 hi March 2018 ah an party lutlai Pi Suu Kyi changtu rian an hrawmter hna.

    Rampi Ruahnak Petu Pi Aung San Suu Kyi le President U Win Myint cu phunghram nih party cawlcanghnak ah telnak nawl a pek hna lo ruangah, Dr. Zaw Myint Maung nih an party rianṭuannak vialte a tlaih dih.

    An party chungtel pakhat nih, “kan vice chairman a damlonak hi thinphang dirhmun sikaw a damnak ding ahcun caan a rau pah ko lai,” tiah a chim.

    Yangon region NLD phu chairman Dr. Soe Win Oo nih, “ralrin ah Dr. Zaw Myint Maung cu cancer lole thluak damlonak a ngeih/lo sizung ah kan checkter. A rauh hlan ah a dam colh ko lai ti ka zumh,” tiah a chim.

    Nain, Dr. Zaw Myint Maung hi ramkhel ruangah thongthlak a rak tongmi sikaw thong chung harnak a tuarmi ruangah a rak zaw pah ṭheomi asi.

    Ralkap cozah uknak a rak doh ruangah kum 19 chung thongthlak a rak tong. Kum 2009 ah an thlah hnu in NLD lutlai phu (CEC) member ah aa tel vemi asi.

    Cun, anih hi voi 3 khelte mipi nih MP ah an thimmi asi. Kum 1990, 2012 caankarlak-thimnak le 2015 zapi thimnak ah MP a tlingmi asi. Mandalay region ah NLD party in aa cuh peng.

    October 24 meeting lio ah Dr. Zaw Myint Maung nih party member pawl cu “a ra laimi 2020 thimnak ah teinak hmuh dingin i zuam uh, teinak hmuh dingin nan thil ti khawhnak karhter uh, nan thiamnak le nan thazaang dihlak chuah uh” tiah a rak forhfial hna.

    NLD nih naite ah caan saupi party member asi cangmi minung 4; Dr. Zaw Myint Maung, Magwe region vuancichoh Dr. Aung Moe Nyo le NLD CEC secretaries U Nyan Win le U Han Tha Myint cu 2020 Thimnak mipi lem rian hruai dingin a thiah hna.

    Dr. Aung Moe Nyo hi NLD nih a ngeihchun vuancichoh tlawmte lakah pakhat asi ve. Mipi nih an ṭanh ngaimi le a minthang ngai vemi asi. October 29 ah 3nak CEC secretary ah a rian an kaih.

    NLD party biachimtu Dr. Myo Nyunt nih, “kan vice chairman a ngandam/lo nak kong cu tam kan hngal lo. A rian tamtuk, kan party rianṭuannak caah rampumpi a cul caah a rethei tuk i si pah,” tiah a chim.

    Party biachimtu nih, “2020 thimnak ca lehlam ahcun, teinak hmuh dingin simanking kan suai dih cang. Kan party rank kal ning a dotdot tein rian kan tuan kho peng ko lai,” ati.

    NLD party thawngthanhnak phu secretary Monywa Aung Shin nih, “Dr. Zaw Myint Maung cu November 10 ah Myanmar a rung kir lai. Nain a kir cangka in a rian a peh kho colh lai maw ti cu a fiang rih lo,” tiah a chim. — The Irrawaddy English

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.