Atu lio cozah tlaitu party NLD nih tlaih a tongmi Chin MP U Hawi Tin thlah dingin halnak cathanh a chuah.
NLD nih, “U Hawi Tin cu Chin state mipi nih vote an pek i an thimmi Amyotha Hluttaw MP pakhat asi. U Hawi Tin nan tlaihmi hi remdaihnak kan i zuammi dawnkhantu tuahsernak asi,” ati.
“Ningcang loin nan tlaihmi asi caah nan tuahsernak hi fak piin kan mawhchiat.
“Hi nan tuahsernak ruangah Chin state mipi le U Hawi Tin a chungkhar an lungrethei tuk. A rannak in thlah dingin a tlaitu pawl kan in hal hna,” ati.
“A himnak kong kan ruah herh. Pakhat khat kan i palh sual cun a him lo sual lai ti kan phang tuk, i thinphang tukin kan hngah lio si,” tiah Rampumpi Hlutdaw (Pyidaungsu Hluttaw) lutlai changtu U Tun Tun Hein nih a chim, tiah Myanmar Times nih a tial.
“Hriamtlai phu nih MP an tlaih cu tutan hi avoi 1nk si. Mah ruang cun MP pawl nih an himnak hnga an i ralrin herh,” ati.
Hlutdaw Niam (Pyithu Hluttaw) in Nuhrin Covo Kawmiṭi secretary U Hla Moe nih, “MP pawl nih an aiawhmi hmun pawl an tlawn tikah penguk zungah vengtu an hal a herh. A daihnak lo hmun a tlawngmi MP pawl cu ahlei in an i ralrin herh,” ati
U Hawi Tin cu a rannak in thlah dingin CNLD, CHRO le chin zatlang bu le khrihfabu 43 zong nih cathanh an chuah.
Sinain, atutiang mah kongah USDP aw a thang rih lo. Chinmi harnak kan ton lio ah zei poi loin an um riangmang i 2020 Thimnak lai ah vote a kan hal ahcun a poi ngai lai.
