Wednesday, December 1, 2021

Nizaan sandahpiahnak in a thimi 74 an si cang

Nizaan ah ralkap duhlonak a langhtertu mipi cu ralkap le palek nih meithal in an kah hna caah a thimi 74 an si cang. Hmasa ahcun a thimi 42 lawng hngalh an si nain a thimi 32 kan hngalh chap hna caah 74 an si cang.

February 1 ah ralkap nih uknak a fir thokin atutiang ah sandahpiahtu mipi 170 a thah cang hna.

Nizaan thah tongmi tambik cu Yangon nitlaklei um Hlaing Tharyar pengah asi.

Zahan zaan ahkhan Ayeyarwaddy ramṭhen Pathein khua ah minung 3 an kah thah hna, adang 4 an hliam hna.

Yangon peng; Hlaing Tharyar, Shwepyithar, North Okkalapa, South Dagon, Insein, Hlaing, Thingangyun, Kyimyindain le North Dagon – le Bago ramṭhen, Kachin state le Mandalay ramṭhen ah zahan ah minung 42 an thah hna.

Hlaing Tharyar peng sizung pakhat nih, “mithi ruak 37 le hliam tongmi minung 40 hrawng kan sinah an ratpi hna,” tiah a thanh.

Yangon um sizung dang pakhat nih, “miruak 7 le nizaan sandahpiahnak hliam tongmi minung 56 kan sin an ratpi hna,” ati ve.

March 3 zongah ralkap le palek nih minung 28 an thah hna.

Nizaan zingka ah Hlaing Tharyar ah sandahpiahmi pawl cu ralkap le palek nih meithal kuan taktak in an kah thluahmah hna i zaanlei khuamui tiang an kah hna. Sandahpiah lomi sangmi zong an kah hna.

Ralkap cozah SAC (State Administrative Council) nih zahan zaan thokin Yangon peng 6 ah ‘Ralkap Upadi (Martial Law)’ kan hman cang lai tiin thawng a thanh. Hlaing Tharyar peng cu atutiang an buai tuk rih.

Sinain, rammi tampi nih tuni zong ralkap duhlonak an langhter rih ṭhiam ko.

Tuni ah Mandalay ramṭhen Myingyan khuapi le Mandalay khuapi ah sandahpiahtu minung 4 an kah thah ṭhan hna.

- Advertisement -