Nitlaklei company nih Myanmar ralkap an mawhchiat nain Asian company cu an holh duh lo

Myanmar ah sipuaizi a tuahmi Nithlaklei ram company pawl; Coca-Cola, Facebook, H&M, Heineken, Nestle le Unilever, tbk. nitlaklei ram company 50 dengmang nih Myanmar ralkap uknak chuhmi kongah lungṭhat lonak minsen an thut.

Sinain, kan innpa a simi Asia company pawl cu an kaa an cip peng ko.

“Myanmar ram ah sipuaisi a tuahmi kan si bantukin, Myanmar mipi le zatlang bu pawl he hmunhma aa hrawmmi kan si. Nuhrin covo, democracy, zalong tein lungum langhternak le upadi ning tein rianṭuannak nih kan dihlak a kan ṭhathnem,” tiin Yangon hrambunh Myanmar Center for Responsible Business (MCRB) nih a ṭial.

MCRB nih “mah cathanh hi minsen kan thutpiak ve uh” tiin February thla thokka in minthutu a khomh lengmang hna nain company tampi nih an thut duh lo. Kan hnu zarh ah sandahpiahtu mipi 18 an thah hna hnu ceo in company pawl holh hram an i thok.

Kan hnu zarh Nilini ah American le European company pawl aiawhtu Ramdang Chawlehnak Bu nih, “ralkap cozah nih meeting a kan sawmmi kan cohlang lo, hohmanh kan kai lai lo” tiin cathanh an chuah.

Mah hnu ceo ahcun, Japan upadi company tumtlang 4 lakah aa tel vemi Nishimura & Asahi nih MCRB cathanh ahcun min a thut ve.

Norway cozah bank nih, “Japan company Kirin Holdings cu uknak firtu Myanmar ralkap company he sipuaizi a tuah caah kan ram nih $1.3 trillion in ramdang company invest kan tuahmi ah telh lo dingin khua kan ruah lio asi,” tiin a thanh.

Japan company pawl nih Myanmar ralkap he i bawm in Yangon ah sipuaizi tuahnak inn Y Complex an sak, tiin Myanmar Zatlang Bu pawl nih UN sinah an report.

MCRB minsen a thumi lakah Adidas, Carlsberg, L’Oreal, Maersk, Metro le Total zong an i tel.

Ramdang company pawl cu ramchung company 100 leng nih minsen an thutpi ve hna. Myanmar company tumtlang bik a si vemi KBZ Bank te pawl zong nih an thut ve.

2014 ah Myanmar a lutmi Norway company Telenor zong nih a thut ve. Telenor cu ralkap nih uknak an chuhka zongah zapi theih in a lungṭhat lonak cathanh a rak chuah lengmang.

Myanmar um Australia Chawlehnak Bu nih Nithumni ahkhan a lungṭhat lonak (ralkap a duh lonak) a langhter ve. “February 1 thokin Myanmar boruak aa thlen caah ramdangmi nih sipuaizi ngan tuah ngam asi ti lo. Buainak donghter ulaw a rannak in democracy cozah ah kir uh tiah kan in forhfial hna,” ati.

Facebook zong nih ralkap thawngthanhnak Facebook le Instagram account pawl a thahpiak thluahmah hna. Ralkap company Myanmar Economic Holdings zong Facebook ah cawngia a onh ti lo.

MCRB cathanh cu Myanmar um Europe Chawlehnak Bu nih a dirkamh. Japan Chawlehnak Bu nih cun a dirkamh duh lo, “kan i ruah lio so” ati men.

Myanmar ah sipuaizi a tuahmi Asia company pawl cu ralkap duhlonak an chim duh bak lo. Singapore company Ascent Capital lebang nih cun “media sinah biachim kan i tim lo,” ati men ko.

Sandahpiahtu kum 25 ngaknu Phyo nih, “kan ram ah sipuaizi a tuahmi company pawl dai ziar tein an ummi hi cu mipi zawnruahnak an ngei lo tiin ka ruah ko,” tiah a lungfahnak a chim.

Singapore Ramdang Vuanci Vivian Balakrishnan nih, “Singapore cu Myanmar ah sipuaizi tuah hi kan i hmaithlak awk asi,” ati ve celngel. Mah cangka in Myanmar mipi nih Facebook ah Singapore ṭamhnak company Crystal Jade, BreadTalk le Ya Kun Kaya Toast pawl duhlonak an langhter.

Myanmar ah sipuaizi a tuahmi Asia company tumtlang pawl cu ralkap duhlonak an chim duh lo nain, Japan company hme le laivuang 3 cu MCRB cathanh ah minsen an thut ve. “Mipi lei ah kan dir, mipi tukvelh, tlaih, thahnawn le nuhrin covo buar cu kan cohlang hrimhrim lo,” an ti.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...