Neymar cu Ronaldo le Messi hnu in a tlung ve cang lai

Neymar cu Ronaldo le Messi hnu in a tlung ve cang lai

Neymar ram Brazil cu Belgium nih 2-1 in a tei caah Neymar le a hawile hna cu Ronaldo le Messi bangin an ram ah kir ruangmang an hau cang.

Naite i Brazil nih 2-0 in Mexico a tei lio ah Neymar cu aa titer tuk i vawlei kil 4 ah capo saihnak caah an hman phah nain, tutan cu aa sum deuh ngai.

Belgium cu an rak men hrimhrim lo, teinak hmu dingah an i tlak hrim, an bawlung chuih aa ruang, an rang in an tthawng taktak. An tung san tukmi hrim nih goal hram ah a bawmh tuk hna.

An chuih in minutes 13nk bakah Belgium lei in Fernandinho nih a goal colh ko. Minutes 31nk ah Bruyne nih a goal colh hoi.

Half-time hlan bakah goal 2 an den hna cu Brazil player cu chimlo, an fans pawl hmanh an tha a duai bak.

Half-time hnu ah Brazil cu biatak tein an cawl. Minutes 76nk ah Brazil lei in Augusto nih a goal. Mah hnu hrim cun Brazil cu an thazaang dihlak in an ttang cang.

Nain, Belgium nih an tlaih khawh peng ko hna. Minutes 95 tiang 2-1 in Belgium nih an tei thai.

Brazil hi World Cup voi 5 bak a la cangmi, vawlei cung ram vialte lakah voi tambik World Cup latu a si nain tutan cu semi-final hmanh a phan bak lo.

An chuih ning zoh tikah Brazil nih bawlung an tlaih caan a tam deuh, 58% bak an tlaih. Goal zong Brazil nih voi tam deuh an sut, voi 26 an sut i voi 9 an ngenh, voi 17 an khen nain voi 1 lawng an goal.

Belgium nih cun voi 8 lawng goal an sut, voi 4 an ngenh, voi 4 an khen i voi 2 an goal.

Brazil nih corner voi 8 an ngah lio ah Belgium nih voi 4 lawng an ngah. A tlangpi in tuak ahcun Brazil nih an chei deuh nain goal an tlolh tuk.

Belgium le France cu semi-final ah an i phomh cang lai. Aa teimi final ah an lan lai i a sungmi cu pathumnak an i cuh lai. Zei ram dah na zumh deuh? Comment…

Be the first to comment

Leave a Reply

Your email address will not be published.


*