15.3 C
Hakha
Thursday, September 23, 2021
- Advertisement -

Ṭial Tharmi

New Zealand ram ah COVID-19 zawtnak ngei 1 te an hmuh caah rampumpi ni 3 chung lockdown an tuah lai

New Zealand ram ah COVID-19 zawtnak ngei 1 te an hmuh caah tu zaan 11:59pm in an rampumpi ni 3 chung lockdown an tuah lai.

COVID-19 zawtnak ngeimi pakhat cu minung tambiknak khuapi Auckland ah tu zingka ah an hmuh. Mah ruangah Auckland khuapi le Coromandel Peninsula vialte cu ni 7 chung lockdown an tuah lai.

New Zealand ram Auckland khuapi ahhin kan Chinmi tampi an um ve.

Ram hruaitu Prime Minister Pi Jacinda Ardern (hmanthlak) nih, “COVID-19 zawtnak a ngeimi hi chawnh fawi tukmi le thih fawi tukmi Delta Variant asi/lo kan check lio asi, asi sual ahcun ṭihnung tuk i a rannak in hma lak a hau.

“Hmasa zongah zawtnak um cangka in tuante ah fak piin lockdown kan tuah colh i a karh manh lo.

“Delta Variant cu ṭihnung deuhmi asi ti kan theih ko, nain ni kum bantukin tuante ah lockdown kan tuah colh ahcun kan tei khawh ṭhanmi asi,” ati.

New Zealand ram lockdown fak bik zulhphung ahcun; sianginn, zung le sipuazi/rian vialte khar dih an si. Ni fatin nunnak caah a herhmi dawr lawng on ngah.

Raikhamsi chunhnak zongah zawtnak a karhnak hnga lo, i runvennak ṭha deuh in tuah hmasa dingin ni 2 (suimilaam 48) chung raikhamsi chunh an ngol chung lai.

Liamcia thla 6 chung kha New Zealand ram ah COVID-19 zawtnak ngei 1 hmanh an hmu hna lo. Tutan hi thla 6 chungah avoi 1nk asi.

New Zealand cu ram hmete asi. US ram state pakhat (Colorado state) nakin a hme deuh. Minung 5 million fai lawng an um.

Pi Ardern nih, “Zawtnak ngei hmuh cangka in fak taktak in lockdown tuah colh hi, zawtnak a karh tuk hnu ah tuah nakin a ṭha deuh.

“Zawtnak a karh tiang hngah i hnu ah lockdown tuah zei tluk in dah a ṭhat lo ti cu kan innpa ram lawng si loin ramdang tampi ah kan hmuh dihmi asi ko.

“Australia ram Sydney khuapi hoi hna zawtnak a karh hnu ah lockdown an tuah i thi deng in an cawlcang nain an kham kho ti lo. Cucaah New Zealand mipi nih lockdown zulhphung nan zulh cio nak lai kan nawl hna,” ati.

Zawtnak ngeimi cu kum 58 pa asi. Zarhteni in khan zawt hmelchunhnak (khuh, taklinh, rawl duh lo, raifanh bantuk, tbk) a ngei. A nupi an test colh nain a ngei lo.

New Zealand mipi cu;

  • An inn pawng ah exercise tuah ding
  • Supermarket, eidin dawr le sii dawr ah thil cawk ding
  • COVID-19 i test le damlo ruang sizung/sikhan kal ding lawngah inn tang ṭum khawh an si.

Inn tang nan ṭum fatin zaangfah tein mask i hruk peng uh, tiah an hruaitu Pi Ardern nih a nawl hna.

Atutiang ahcun Pi Ardern acozah nih New Zealand ram ah COVID-19 pulrai a kham khawh ngai. Ni kum zawtnak aa thokka in atutiang ah minung 2,570 te lawng zawtnak an i chawn manh. 26 te lawng an thi. Adang cu an dam dih cang.

Raikhamsi chunh balte an nuar ngai. Atutiang ah raikhamsi 2.55 million lawng an chunh rih hna. Voi 2 ning tein chunh cangmi cu 1 million hrawng lawng an si rih.

Pi Ardern nih, “September 1 thok cun kum 18 cung a simi paoh nih raikhamsi i chun dingin sok (appointment lak) khawh asi cang lai,” ati.

“Rianrang tein New Zealand mipi vialte acheu cio kan chunh khawh zokzok hna nakhnga, zarh 6 hnu lawngah voi 2nk chunh asi te lai,” ati.

Atanglei hmun pawl hi zawtnak ngeimi pa a kalnak le caan an si

Atanglei hmun pawl ahhin langhtermi caan chungah na kal ahcun Ngandamnak Zung ah phone kan chawn ulaw thawng kan thanh uh, an ti.

  • Star and Garter Hotel Coromandel at 5 Kapanga Road, Coromandel 3506 on 13 August, 2021 from 6:39pm to 7:40pm
  • Umu Cafe Coromandel at 2 Wharf Road, Coromandel, 3506 on 13 August, 2021 from 7:40pm to 8:30pm
  • BP Gas Station Coromandel at BP Gas Station, Tiki Road, Coromandel, 3056 on 14 August, 2021 from 9:30am to 9:40am
  • Driving Creek Railway Tours Coromandel at 380 Driving Creek Road, Coromandel, 3506 on 14 August 2021 from 10:30 am to 10:50 am
  • Jaks Cafe & Bar Coromandel at 104 Kapanga Road,Coromandel, 3506 on 14 August from     10:50 am to 11:30 am
  • Hereford ‘n’ a Pickle Coromandel at 2318 Colville Road, RD 4, Colville, Coromandel 3584     on 14 August, 2021 from 1:25pm to 2:15pm
  • Taras Beads Coromandel at 1/75 Kapanga Road, Coromandel, 3506 on 14 August 2021 from 3:00pm to 3:10 pm
  • Richardsons Real Estate Coromandel at 151 Kapanga Road, Coromandel, 3506 on 14 August, 2021 from 3:30 pm — 3:35 pm
  • Umu Cafe Coromandel at 22 Wharf Road, Coromandel, 3506 on 14 August, 2021 from 6:17pm to 7:11pm
  • Star and Garter Hotel Coromandel at 5 Kapanga Road, Coromandel 3506 on 14 August, 2021 from 7:11pm to 9:00pm
- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -