Sandahpiahtu mipi an ṭhenṭhek hna tikah hmaisuang in vengtu a simi Rescue Task Force phu cu mintami Nay Chi Oo nih tangka a hlut nain “cohlan loin kan khirh” tiah Rescue Task Force nih an Facebook page ah an thanh.
“Kan phu ah a lutmi chungtel an tam chin lengmang caah a herhmi uniform le i vennak thilri cawknak caah tangka bawmtu kan herh,” tiin Rescue Task Force nih mipi sinah bawmh a hal caah Nay Chi Oo nih ting 5 a hlut hna.
“Nay Chi Oo cu ralkap he rianṭuan ṭimi asi caah Mipi Nih Dantat aiah cohlang hlah uh a titu an tam caah a hlutmi tangka cu kan khirh,” tiah Rescue Task Force nih a ṭial.
Nay Chi Oo apa hi ralkap bawi hlun asi.
Mah pinah, Nay Chi Oo te chungkhar company Sein Lay Tin le Nay Chi Oo company Beautybynachi cu ralkap he aa pehtlaimi an si, tiah UN nih a thanh.
Facebook ah 1.2 million followers a ngeimi si nain tuni cun a Facebook account zong hmuh khawh si ti lo.
Amah nih a thuh chung (deactivate) maw si Facebook nih a kharpiak dah si ti bal hngalh asi lo. Facebook nih ralkap he aa pehtlaimi account tampi a kharpiak hna.
