Myanmar voksa cu China, Thailand le Taiwan ah zuar an khap

voksa

Myanmar ram ah Africa in aa rak thokmi vok zawtnak cu a phan ve i atu hi China, Thailand le Taiwan nih an ram ah Myanmar ram in a chuakmi voksa zuar an khap.

“African vok zawtnak cu Myanmar ram ah avoi khatnak bik kan hmuh,” tiah Cinthlaknak Vuanci Zung nih nizaan ah a fehter.

August 1, 2019 ahkhan Shan state, Keng Tung khua ah Africa vok zawtnak hrik cu an hmuh. Chinra ramri pawngte ah a ummi a si.

Keng Tung khua ahcun vok 65 an zuat i vok 12 an thi cang. Vok 15 ah zawtnak hrik an hmuh. A tangmi vok cu thah an hauh caah an thah hna.

South East Asia ram chungah Africa vok zawtnak cu Vietnam, Cambodia le Laos ram ah hmuh a si cang i, Myanmar ram hi a 4nk a si.

Africa vok zawtnak hrik cu February thla ahkhan Vietnam ram ah a chuak i May thla chung tiang ah vok a thimi 1.7 million an si.

Vok tampi a zuatu China zongah vok zawtnak cu a phan ve cang. China sibawi pawl nih vok zawtnak khamtu sii an ser lai. Mah vok zawtnak hi saram caah thihnak a si ko nain minung caah tih a nunglo.