Myanmar UN palai Kaw Moe Tun nih, “Myanmar ram ah sipuaizi tambik a tuahtu Japan telh in ramdang vialte nih Myanmar ram ah sipuaizi tuah rih hlah uh,” tiah a nawl hna.

Kan hnu thla UN General Assembly meeting pi ah ralkap dohnak le mipi dirkamhnak bia a chimtu Myanmar UN Palai Kaw Moe Tun nih, “Ramdang nih Myanmar ah sipuaizi an tuah ahcun ralkap an rumter hna, ralkap rumter nakin mipi nunnak khamh a biapi deuh,” tiah a chim.

“Atu caan hi Myanmar mipi caah a biapi tuk. Sualnak ngei lo rammi khamh an hau. Cucaah ramdang nih Myanmar ah sipuaizi tuah ngol chung uh.

“Ralkap nih Myanmar mipi a thah peng hna caah thah an ton tinak hna lo ramdang nih veng hna uh.

“Hartongmi bawmhnak pe hna uh, Myanmar ralkap nih vanlawng in mipi a kahnak hnga lo Myanmar ram ah vanlawng zuanter lo dingin nawl chuah uh. Uknak firtu ralkap cozah tangka luhnak phit ulaw ramdang nih Myanmar ah sipuaizi tuah ngol chung uh,” ati.

“Ramdang nih Myanmar sipuaizi an phih dih ahcun mipi zong harnak an tong ve ko lai, nain mipi an thah thluahmah hna, an tukvelh hna, a sual lomi an tlaih thluahmah hna caah zoh sawhsawh awk a ṭha lo.

“Mipi harnak tong tuk lo dingin ralkap cozah tangka luhnak phihpiak dingin UN Security Council le ramdang kan nawl peng hna.

“Sipuaizi maw a biapi deuh minung nunnak ti hi cuai thlai a hau. Sipuaizi phihmi cu hnu ah on ṭhan khawh asi,” ati.

Kyaw Moe Tun cu ralkap nih “ram rawitu na si” tiin Myanmar UN Palai rian an phuah nain an phuak kho lo. UN zong nih Kyaw Moe Tun lawng a cohlan.

“Mipi thimmi cozah nih Myanmar UN Palai rian an ka pekmi si, cucaah mipi thimmi cozah lawng nih aa ka phuah khawh,” ati.

“Ralkap nih an ka tlaih lai, thah lai ti cu ka thinphang lo. US, UN le ka ram mipi zong nih an ka ṭanpi ko caah ka ṭih lo,” ati.