Uknak firtu Myanmar ralkap cozah nih, “Russia nih Ukraine a tuk awk si ko. Mah nihhin Russia cu vawlei cungah a ṭhawng bikmi ram a sinak a langhter,” tiah tuni ah a chim.
Myanmar ralkap nih a hriamnam tam deuh hi Russia sinah a cawkmi lawngte asi. Mah pinah UN Security Council zongah Russia nih Myanmar a dirkamh peng caah Myanmar ralkap nih cun pathian bantukin aa tlaihmi asi.
Russia nih vanlawng, drone, tank le missile in Ukraine a tukmi cu vawleipi nih fak takin a mawhchiat i chiakha takin Russia sipuaizi an phih.
Nain, Myanmar ralkap cozah biachimtu ralbawi Zaw Min Tun nih cun, “Russia ralkap nih Ukraine an tukmi hi Russia ram hmunhnak caah a herhmi si caah an mawh lo.
“Russia nih vawlei cungah ram ṭhawngbik a sinak a langhter,” tiin cathanh a chuah. Cathanh cu Russia ca in a chuah.
Ni kum ah, Myanmar ralkap lubik Min Aung Hlaing cu Russia khualipi Moscow ah a tlawng i Russia cozah ralkap hriamnam ser le zuartu Rosoboronexport company lutlai he tonbiaruahnak an ngei. Myanmar ralkap hriamnam serpiaknak kong an i ruah.
Russia Ralkap Vuanci Pu Sergei sin zongah Min Aung Hlaing nih, “Russia nih na kan bawmhnak thawng in Myanmar cu innpa ram pawl lakah a ṭhawngbik ah kan i tel ve cang,” ati.
Min Aung Hlaing nih Russia sinah a cawkmi ralkap vanlawng le hriamnam pawl hmang in mipi thimmi cozah uknak a chuh i rammi thong tampi a thah cang hna.
Rammi 1 million hrawng ralzaam dirhmun ah an um cang. Chin state lawngah ralzaam ting 1 deng an um cang.
Russia nih nizaan ah Ukraine ram a tuk thokin atutiang ah sualnak ngei lo Ukraine rammi a zaza a thah cang hna. Ukraine rammi a tingting nunnak kawl in an zaam cuahmah hna — mah hi hmet law relchap.
Hlan ahcun Myanmar nih China sin deuh ah hriamnam a cawk tawn nain liamcia kum 10 chung cu Russia sinah a cawkmi tam deuh.
