Myanmar Rili Ralkap nih, “Bangladesh ram in phungninglo minung 173 a phormi tilawng cu Tanintharyi region i Kawthaung peng rili cungah kan tlaih,” tiah thawng a thanh.
“Myanmar rammi 7 nih an monghmi ‘Bengali’ 173 a phortu tilawng u Zarhpini zingka ah kan tlaih,” ati.
Ralkap biachimtu ralbawi Zaw Min Tun nih, “tilawng cu radar ah a lang. Minung 181 an tlaih hna. ‘Bengali’ deuh lawngte an si. Pa 82, nu 69, pa ngakchia 14 le nu ngakchia 9, cun tilawng rianṭuan 7 an si,” tiah a chim.
Tilawng cu Bangladesh ram i St Martin Island ah a ummi Bangladesh pa nih a rak timhpiakmi hna asi.
Voice of America media nih, “Bangladesh ralzaam camp ah a ummi ralzaam deuh lawngte an si,” tiah a thanh.
2017 ah Rohingya hriamtlai ARSA nih Myanmar palek le ralkap sakhan an tukmi hna cu ralkap nih a lehrulh hna caah Rohingya 730,000 leng Bangladesh ram ah an zaam i ralzaam camp ah an um hna.
Ralzaam camp in atu le tu ramdang ah an zaam lengmang hna.
Grig-Gen Zaw Min Tun nih, “hlathlainak kan tikah, December 1 ah Bangladesh ram in an i thawh. Malaysia ah kal aa timmi an si. Kan tlaihmi hna cu Kawthaung ah kan kuat hna lai,” tiah a chim.
November thla zongah, Rakhine state in Yangon ah zaam aa thawhmi minung 96 cu Ayeyarwaddy region i Pathein pengah a ummi Chaungtha Kanche ah an tlaih hna.
2018 November zongah, Rakhine state khualipi Sittwe ralzaam camp in Thailand ah zaam aa thawhmi minung 100 cu Yangon region Kyauktan pengah an tlaih hna.
Charhchan: The Irrawaddy – English
