Rili cungah an hmuhmi ritsii

PATHEIN, Ayeyarwady Region — Kawlram tangka 3 trillion (US$1.96 billion) dengmang man ritsii cu Nithumni ahkhan Ayeyarwaddy ramṭhen i Ashae Pyar khuate pawng rili cungah aa rak vuanhmi an hmuh. Lungthawhnak ritsii asi tiin kan zumh, tiah palek nih an chim.

Ashae Pyar khuate pawng rili cungah aa vuanmi songkhoi tampi cu ngatlai pawl nih an hmuh. Songkhoi 23 cu ngatlai pawl nih an char i an boss sinah an ap. An boss nih songkhoi an on i ritsii an hmuh caah songkhoi dihlak in palek sinah an ap.

“Ritsii cu ‘ice’ iin auhmi lungthawhnak ritsii an si tiah kan zumh. Laboratory ahcun kan kua rih lo nain lungthawhnak ritsii an si tiah fianghlang tein kan zumh caah thil sining tam deuh kan hlat cuahmah lio asi,” tiah Ayeyarwaddy ramṭhen palek bawi Colonel Shwe Thaung nih a chim.

Songkhoi 23 chung ahcun 1kg cio a ritmi ritsii tom 649 an hmuh. Kawlram tangka 2.92 trillion man hrawng asi, tiah palek sin in kan theih.

A tlawmtam le a man tuak tikah, Ayeyarwaddy ramṭhen ah kan tlaihmi ritsii vialte lakah tutan hi a tambik si, tiah palek nih an chim.

Lungthawhnak ritsii ahhin phun tampi a um. Tutan an tlaihmi hi ice cu lungthawhnak ritsii lakah a thiang bikmi le a pin bikmi asi.

“Ritsii le saṭhil cu a thlithup in rili cungin Bangladesh ram ah an luhpi tawn. Ritsii cu Yangon le Pyapon in an chuahpi tawn. Saṭhil cu Bogale in an chuahpi tawn hna,” tiah min langhter a duh lomi Pyapon khuami pakhat nih a chim.

“Mah ritsii pawl hi, a phortu pawl nih ti ralkap an ratmi an hmuh caah an thinphang i an hlonhmi si lai ti ka zumh,” ati.

Palek bawi Shwe Thaung nih, “Ayeyarwaddy ramṭhen ah ti he tlang he phungninglo ritsii phorh kham dingin simanking kan suai, phungninglo ritsii phorh dotu palek phu zong Pyapon khua ah kan ser,” tiah a chim. — The Irrawaddy [English]

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...