Myanmar Ram Ah Zun-thlum Le Thi-tlum Zawtnak A Karh Tuk

Myanmar Ram Ah Zun-thlum Le Thi-tlum Zawtnak A Karh Tuk

Myanmar ram ah zun-thlum le thi-thlum zawtnak a ngeimi an tam chin caah tu ning tein cun tu hnu 10 ah thinphang dir hmun kan phan kho tiah Myanmar zun-tlum, thi-tlum zohkhenhtu bu nih a chim.

2014 ahkhan Ngandamnak Vuanci zung le Vawlei ngandamnak Bu i bawm in Myanmar ram chungah kum 24-64 kar minung sinah dothlatnak an tuah. Minung 100 ah 10 leng deuh cu zun-thlum zawtnak an ngei.

“Zun-thlum, thi-thlum zawtnak a ngeimi an karh tuk i thinphang si cang. Kum 2013-14 ahkhan Yangon ramtthen lawng hmanh ah zun-thlum, thi-thlum zawtnak a ngeimi 100% ah 11.84% (12% dengmang) an um.”

“Atu ah ramtthen le state 14 ah dothlatnak kan tuah i Yangon ramtthen lawng hmanh ah 18.2% cu zun-thlum, thi-thlum zawtnak an ngei. Kum 2014 lio nak in 6% a karh. Biatak tein kan i kilven lo ahcun tu hnu kum 10 ahcun thinphang dirhmun kan phan kho,” tiah Dr. Tint Swe Let nih a chim.

Kum 2015 i vawlei cung zun-thlum zawtnak ngeimi hi minung 415 million an si. Second 6 dan ah zun-thlum zawtnak in minung 1 a thi. Kum 2040 ahcun zun-thum zawtnak a ngeimi hi minung 640 million an si te lai tiah ruah a si.

Myanmar ram ahhin chawnh khawhmi zawtnak nakin chawnh khawh lomi zawtnak a ngeimi an tam deuh i kum fatin chawnh khawh lomi zawtnak in minung 1 million an thi.

Zun-thlum zawtnak ngeih hnu ahcun lung ah thi a kal kho ti lo, zennak, mitcawtnak, kum khua upat hlan ah thih, kal zawtnak, thikai zawtnak a cang kho.

Myanmar ram ah ngandamnak caah a ttha lomi tirawl dinei ruangah a thimi 4 lakah 1 cu thih zat hlan ah a thimi si i cancer in a si.

Atu hi Myanmar ram pumpi ah zun-thlum, thi-tlum zawtnak a ngeimi hi minung 2.5 million an si.  _ Eleven Media