Myanmar ralkap sniper in Myanmar ralkap 100 a thattu CDF-Mindat sniper Salai Naing Tam

- Advertisement -

CDF-Mindat ralbawi Salai Naing Tam nih Myanmar ralkap lamhla kahnak meithal (sniper) lila in Myanmar ralkap 100 hrawng a thah hna, tiah kan theih.

Amah Salai Naing Tam nih thil sining cu atanglei bangin a chim.

Salai Naing Tam (CDF-Mindat sniper): Keimah cu thlanglei CDF-Mindat phu hruaitu ka si. CDF-Mindat ahhin battalion 20 kan um. Battalion 1 ah ralkap 270 cio kan um. A herh tikah auh ding kenret ralkap thong tlawmpal kan ngei. CDF-Mindat cheuthum-cheuhnih hi keimah hruainak tangah an um.

‘Sniper in Myanmar ralkap 100 hrawng a thah hna’ an ka timi cu a dikmi si ko – nain an ruak kan hmuhmi cu 70 hrawng si. Adang hi cu ral ruangah a hmun ah va kal in an ruak kan zoh kho lo. Nain kai tinh ning tein ka khen hna ti cu fiang tein ka hngalh ko. Theih lo cun 100 leng zong an si kho silole 100 hrawng zong an si kho.

CDF-Mindat kan dirhka ah meithal kan ngei lo. Mahtein serchommi Lai meithal chiahru te lawng kan ngei. Myanmar ralkap he i kah taktaknak ahcun asi khawh deuh lo caah Myanmar ralkap meithal kan chuh hna hau.

Ṭha tein kan i timhlamh hnu ah 2021 April thla ah Myanmar ralkap motor kan ramh/hrawh i hriamnam tampi kan lak. Sniper 2 zong kan lak. Pakhat cu hman khawh si ti lo. A ṭhami 1 cu kai tlaih i biatak tein a hman ning ka cawn. Kan lakmi sniper hi falong 2 le cheu (500m) tiang lawng a kap khomi si caah ralring tein ka hman.

Ka Konglam

Mandalay University ah sibawi ka rak kai nain lim loin kai phuak i Tourism Business ka tuah. 2020 Thimnak ah thinlung tak tein Chin party a rak ṭanhmi ka si. 2021 ah ralkap nih uknak an fir hnu in sandah ka piah, sandahpiah an khap in hriamnam in i tlaih in atutiang ka doh hna.

Raltuk tinṭan a kan petu hi cu zapi theih dingin chim awk a ṭha tuk lo. Hriamtlai phu pawl nih an kan pek ti tiang lawng ka chim ko lai.

Ka ṭuanhawi CDF-Mindat ralkap dang pawl bangin, ralhrang vialte thah dih hi kan i tinhmi si. Hi zat ka thah hna cu kai lunghmuih tuk ko, nain tampi thah rih an hau. A ra laimi ni le zarh le thla ah sachia pawl tampi kan thah rih hna hau.

CDF-Mindat cu mipi hremtu Myanmar ralkap uknak hrawh dingin nunnak a thapmi kan si. Atu lio hi Myanmar ralkap uknak a hram bongh dingin Myanmar rammi vialte i lungrualnak caanṭha bik asi.

CDF-Mindat cu nan theihcia bangin ramtang ah harnak fakpi kan tuar peng ko. Atu lio cu a kih tuk ahhin – (minus) tiang a phan. Mah tluk zaan kik lak ahcun ramtang ah kan i tom peng ko.

Nain, CDF-Mindat ralkap lawng kan tuar lo. Kan mipi zong ralhrang nih khua ah an luhhnawh caah an kan thah lai, kan nun buin an kan khangh thah lai tiah nunnak kawl in ramtang tlangpar ah an zaam hna. Zaan fatin tlangpar ah khuasik fak taktak an tuar peng ve.

Ralkap uknak hrawhnak caah bawmhnak tampi kan herh bantukin, Mindat pengah kan mipi ralzaam 40,000 leng an um cang. Anmah zong hi kanmah tluk tein bawmhnak an herh ve.

UN nih Chin state thlanglei (thlangei Laitlang) ah ralzaam buk le bawmhnak a tuah hrimhrim a herh. Ramdang nih an kan bawm duh lo tiin kan i ruah ko cang. — Chindwin News Agency

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...