Tuni ah Myanmar ralkap nih Buddhist Kumthar (Thingyan) lawmhnak caah ngaihthiamnak in thongtla 23,184 a thlah hna.

Tuni thongtla an thlahmi hna lakah ralkap duhlo langhter ruangah thongthlakmi an i tel/lo hngalh a si rih lo.

Myanmar ram ahcun kum fatin Buddhist Kumthar lawmhnak caah president nih thongtla tampi a thlah tawn hna. Tu kum zong ralkap nih thongtla an thlah ve hna.

Myanmar ram ahcun tuni hi Buddhist Kumthar puai aa thok nikhatnak a si.

Ralkap nih uknak a lak hnu in amah a dotu he aa pehtlaimi minung 3,141 a tlaih cang hna.

“Tuni thongtla thlahmi lak ah a tam deuh cu February 1 hlah ah thong a rak tla cangmi an si hna. Nain, Feb 1 hnu i thongtlami zong tlawmpal an i tel,” tiah thonginn lei ttuanvo ngeitu Kyaw Tun Oo nih a chim.

Ralkap nih thongtla thong tampi a thlah hna lio ah tlaih dingin a kawl liomi minung 832 an rak um ve. Tlaih dingin a kawlmi hna hi sandahpiahnak ah aa telmi le ralkap a duhlomi pawl an si.

Tlaih dingin ralkap nih a kawl liomi hna lakah minung 200 hrawng cu minthang pawl an si.

Tuni ahkhan film director Christina Kyi le a va minta Zenn Kyi cu Yangon in Thailand ah zaam an timh lio ah airport ah ralkap nih an tlaih hna.