Uknak firtu Myanmar ralkap TV Myawaddy nih, “Rammi Lungrualnak Cozah (NUG) hruaitu vialte cu ram rawitu an si caah tazacuai dih an si cang,” tiah zahan zaan 8pm ah thawng a thanh.
Caankarlak cozah NUG cu CRPH nih ralkap cozah thlaknak caah April 16 ah a dirhmi si.
Chinmi chungin Dr. Sasa le Dr. Lian Hmung Sakhong zong Ramdang he Rianṭuanṭinak Vuanci le Federal Ram Vuanci rian a pek hna.
Ralkap nih, “NUG cu phungninglo bu le ram rawitu asi” tiin upadi 2 in taza a cuai hi si.
Ralkap nih uknak a fir hnu in March thla ahkhan “ram rawitu cu thah (thihdan pek) an si lai” tiin nawl a rak chuah.
Cucaah, Dr. Sasa le Dr. Lian Hmung Sakhong telh in vuanci le vuanci changtu vialte le Vice President, Prime Minister, tbk. pawl cu ralkap nih a tlaih khawh hna ahcun a thah khawh hna tinak asi.
Dr Sasa: Ralkap nih an ka tlaih cun an ka thah lai
Nain, NUG vuanci cheukhat cu ramleng ah an um caah ralkap nih a tlai kho theng hna lai lo. Dr. Sasa le Dr. Sakhong zong Kawlram chungah an um lo.
Ramchungah a ummi hnih khat zong miphun hriamtlai phu nih an ukmi hmun, ralkap luh khawh lonak hmun ah an um.
