Myanmar Ralkap nih May 5 in university le college kan on lai ati

Uknak firtu Myanmar ralkap nih a ra laimi May 5 in university le college kan on lai, tiah thawng a thanh.

Cozah technology college AGTI diploma a donghnak simi kum 3nak le cozah technical high school a donghnak kum 2nak tinṭan kan on lai, ati.

Mah pinah; 2019 – 2020 Cacawn Kum ah university le college a donghnak kum kaimi pawl le master a kaimi pawl zong kan kaiter (on) hna lai, ati.

Uknak firtu ralkap cozah kuttang ah university le sianginn (fimcawnnak) a ṭhangcho lai maw hawi dawt ruat ve hmanh.

Uknak a fir hnu ah ralkap bawizik Min Aung Hlaing nih a chim bikmi cu punghman in cozah rianṭuan ṭhannak khawh kong, sehzung le rianṭuannak zung pawl on ṭhan khawhnak kong, tlanglawng pawl punghman in kalter ṭhan khawhnak kong, bank pawl on ṭhan khawhnak kong, tbk pawl asi i sianginn on ṭhan khawhnak kong zong a chim lengmang.

Naite zongah, ralkap biachimtu ralbawi Zaw Min Tun nih, “A rauh hlan ah sianginn kan on lai,” tiah a chim.

Min Aung Hlaing nih May 5 in university le college on dingin thawng a thanh cang i high school tanglei sianginn zong on caan a phak tikah on dingin a chim tawn nain harnak nganpi nih a hngah. Saya/ma hohmanh an kai lai lo. CDM an lut dih.

Kum 1962 ah ralkap nih mipi cozah uknak a chuh hnu ah a kuttang ah fimcawnnak zei dah a lawh ti cu rammi vialte hngalh asi ko. Ralkap nih an duhpaoh in fimcawnnak an thlen i an hneksak. Siangngakchia cathiamnak le ṭhanchonnak nakin anmah uknak a hmunh khawhnak ding tu kha usape in an cawnter hna, ram (ralkap cozah) daw dingin ngakchia an thluak an ṭawl hna ti khawh asi.

Mah ruangah kan ram fimcawnnak hnu a khar tuk i cathiam lo an tam tuk caah kum 2016 ah NLD nih uknak a ngah hnu lawngah a remh i ṭhat lei panh aa thok ka ceo asi.

Hi tluk kan ram fimcawnnak a biapit lio caan ah ralkap bawi pakhat nih uknak a fir ṭhan tikah, ralkap kuttang ah kan ram fimcawnnak a ṭhancho ding hi cu i ruahchan ngam ding asi lo.

Burma ram cu Mirang nih an rak uk lio ah South East Asia ram vialte lakah a rumbik 2nk le cathiam tambik ram a rak si. Vawlei cungah facang tambik ramdang ah a zuartu, kokek thilchuak thinghak, zinaan, tbk tampi ramdang ah a zuartu, ram rum taktak a rak si. Yangon University hna khi South East Asia ram vialte cul in a minthangmi a rak si.

Kum 1948 ah Mirang uknak in luatnak kan hmuh cangka in Prime Minister U Nu nih sipuaizi ngan pawl cozah nih tlaih dih dingin policy a ser caah ramdang ah facang zuarmi cheuthum cheuhnih a zor pinah leitang chuak ramdang ah zuarmi a um ti lo (96% a zor). Kum 14 hnu, 1962 ah ralkap nih uknak an fir i cinthlaknak dah ti lo adang sipuaizi pical vialte cu cozah (ralkap bawi) nih an tlaih dih i fimcawnnak zong an thlen dih caah mah tluk a rummi le ca thiammi ram cu kum 50 chung te (1962 – 2012 tiang) bakah vawlei cung ram sifak bik le cathiam lo bik ram ah aa chuah.

Awṭha minthang David Lai nih, “Ralkap nih uknak a fir cangka in ka lungrawh bikmi cu fimcawnnak kong hi asi. Atu mino le a ra laimi mino pawl fimcawnnak kongah ka lungrawk tuk,” tiah a chim.

“Ṭhancho aa thok kami Myanmar fimcawnnak hi hnu a kir ṭhan lai ti a fiang. Sandah ka piahmi zong mah ruangah asi. Adang kong nakin hmailei kan ram fimcawnnak kong hi ka ruat deuh. Fimcawnnak a ṭhat cun adang zong an ṭha thluahmah lai ti ka zumh. Ralkap nih an tuah ding fimcawnnak hi cu ruah ah fihnung asi,” tiah a lungrawhnak kong a chim.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...