Chin state, Mindat pengah a ummi Khonumthung Tlang Kokek Dum (Mount Victoria National Park) cu ralhrang Myanmar ralkap nih an duah, tiah kan theih.
CDF-Mindat he kan i kap i anmah luatnak caah Khonumthung Kokek Dum cu bomb in an kah duah, tiah CDF-Mindat nih a chim.
Nai hrawng cu Chin mipi thah dingin Mindat in Matupi lei a kalmi tank 2 le ralkap motor 83 cu CDF-Mindat nih an kah peng hna.
Myanmar ralkap nih an kalpah in tank le hriamnam phunphun in pawngkam an kah pah thluahmah.
Mindat – Matupi lamkam um inn le sekhan tam ngai an khen hrawh cang.
ASEAN ro lakah aa tel vemi Khonumthung Tlang Kokek Dum zong miakpi le bomb in an kah caah kokek thingram tampi an kaang rawk dih, tiah Mindat Mipi Uktu Phu nih January 12 ah a thanh.
Khonumthung Tlang cu ahohmanh nih thingkung hau lo ding, ram vaih lo ding kokek thingram le saram humzual dingin rampumpi cozah nih national park (kokek dum) ah a chiahmi si.
Matupi pengah CDF le CNA nih Myanmar ralkap an kah tuk hna caah Myanmar ralkap tampi cu tank 2 le ralkap motor 90 hrawng in Magway ramthen, Kyauktoo khua in Mindat in Matupi lei ah an kal cuahmah liopi asi.
Matupi peng khua 3; Tipaw, Kace le Kihlung cu ralkap nih an luhnawh caah khuami vialte ramtang ah an zaam dih. Kace khuami telh in mipi 10 ralkap nih an tlaih hna i chiakha taktak in an thah hna. An ruak zong voi tampi an ciktan dih.
