Myanmar ralkap nih uknak a fir thokin thla 11 chungah Chinmi 160 leng an kan thah cang, tiah Institute of Chin Affairs (ICA) nih thawng a thanh.

Myanmar ralkap nih mipi thimmi cozah cu meithal in uknak a chuh cangka in buai lo tein sandahpiahmi mipi a thahnawn lengmang hna, a tlaih hna, khua tampi a khangh. Miakpi le hriamnam ngan le vanlawng tiang in a kah hna.

Ralkap nih Chinmi 160 leng an kan thahmi chungah 13 cu nu an si. Cun, hriamnam zong a tlai lomi mipi sawhsawh 87 a kan thah cang. Sandahpiah khawh lo ruangah hriamnam tlaih in dothlennak a tuahtu Chinmi 76 a kan thah cang.

Mah chungah, Chinmi 7 cu an nun buin a khangh thah hna. Chinmi 3 cu ralkap nih bomb hmenhmi in a thah hna.

Myanmar ralkap le a tapeh USDP ruangah thah a tongmi Chinmi 160 leng chungah 8 cu nihin tiang an ruak zong lak khawh asi lo.

Hitin a kan thahnawnmi cu ICA nih fak piin duhlonak a langhter i hi bantuk thahnawnnak ngolter dingin ramdang vialte nih Myanmar ralkap cungah fak piin hma lak dingin a forhfial hna.