Wednesday, December 1, 2021

Myanmar Ralkap: Kum 1 Hnu ah Thimnak Kan Tuah Lai i Teitu Sinah Uknak Kan Pek Lai

Tu zingka ah Myanmar ralkap nih NLD cozah uknak a chuh khawh in, “kum 1 chung ralkap nih ram kan uk hnu ah thimnak kan tuah lai i teitu sinah uknak kan pek lai,” tiin a thanh.

“A dikfel mi party tling democracy thimnak kan tuah lai i teitu sinah uknak kan pek lai,” tiah Myanmar ralkap nih a official Facebook page ah a thanh.

“November 8 thimnak ah mee dik lo tamtuk a um caah thimnak phichuak kan cohlang lo” tiin ralkap le a ṭanṭi USDP party nih bia an ṭawncop mi cu zeihmanh tatte an langhter khawh lo caah NLD cozah nih hma a lak piak lo.

“Hma na la lo …. ” tiin ralkap nih tu zingka dei hlan ah Aung San Suu Kyi, President U Win Myint, Vice President Pu Henry Van Thio le rampumpi vuanci vialte, Chin state telh in state le region 14 cozah vialte a tlaih dih hna i uknak a chuh.

Ralkap nih Vice President an ṭuantermi U Myint Swe kha caankarlak president a ṭuanter.

Caankarlak president U Myint Swe nih, “kum 1 chung ralkap nih ram kan uk lai,” tiin a thanh i uknak cu ralkap bawizik Min Aung Hlaing sinah a pek.

UN le Ramdang nih Au Hnawh

UN, EU, Britain, Australia le Japan nih ralkap tuahsernak an lungtlinlonak kong an chim colh.

US President Zung nih, “ralkap nih NLD sinah uknak na pek ṭhan lo ahcun hma kan lak lai,” tiin a tlerh.

US Ramdang Vuanci pu Antony Blinken nih, “a rannak in uknak pe ṭhan law Suu Kyi le cozah rianṭuan vialte thlah dih hna,” ati ve.

China nih, “thil sining tling deuh in kan hlat lai. Myanmar le China cu aa dawmi innpa kan si. Kap hnih nih nan i hmuhthiam lonak hi phunghram ningin tawlrel ulaw ram le zatlang daihter uh,” ati.

Singapore nih, “kan lungṭha lo tuk. Tuante ah ṭha ṭhann seh ti kan i ruahchan,” ati.

Indonesia nih, “thimnak kongah nan i hmuh thiam lomi hi upadi tu in tawlrel uh,” ati.

Malaysia nih, “nan ram ah daihnak, himnak le upadi tu usape uh,” ati.

Thailand, Philippines le Cambodia nih, “Myanmar thil cang hi an ram chung kong asi,” an ti – kan i thlak duh lo an ti.

Thailand khualipi Bangkok um Myanmar tanzung hmai ah Myanmar rammi 200 hrawng nih duhlonak an langhter i Thailand palek nih an dawi hna. Minung 2 an tlaih hna.

Japan khualipi Tokyo um UN zung hmai ah Kawlrammi tampi nih duhlonak an langhter.

Naite thimnak ah teinak a hmumi MP thar pawl kha tuni hin rianṭuan aa thok ding an si. Tuni hi avoi 1nak bik Hluttaw meeting a tuah ding an si caah ralkap nih tuni ah uknak a chuh hi si.

Myanmar rampumpi ah ralkap nih phone le internet line an phih dih. Bank tangka chuahnak seh ATM zong an phih.

Yangon, Mandalay, Hakha, tbk. state le region kip khualipi paoh ah hriamnam he ralkap atu le tu an i chawklet. Vanṭhat ah, thisen luan tiang cu a um hraw rih lo.

Naypyitaw chaklei ah miakpi, tanks le helicopter tampi in ralkap an khat lulh. Hluttaw kalnak lam paoh cu kuan teih lo motor in ralkap nih an kham dih.

- Advertisement -