Nizaan December 3 ah Mandalay in Monywa lei ah Chindwin tiva cung kalmi uknak firtu Myanmar ralkap tinbaw 2; Shwe Joe Phyu chiti a phurmi tinbaw le B tinbaw cu Nhalone Hla Gate ah kan tlaih hna, tiah Sagaing ramṭhen, Myaung peng PDF (CDSOM) nih thawng a thanh.
Myaung peng luhchuahnak gate vialte ah Myaung PDF (CDSOM) ralkap nih minung le thilri an check dih. Uknak firtu Myanmar ralkap cozah thilri paoh cu ‘mipi thilri asi’ tiin kan tlaih viar hna lai, ati.
“Kan tlaihmi thilri pawl cu Myaung peng mipi ralkap (CDSOM) le Myaung peng mipi caah kan hman lai.
“Myaung peng luhchuahnak gate pawl ah kan in check hna tikah nan duh lo ahcun, fak piin a theipar zunter nan si lai,” ati.
Myaung peng luhnak gate 5 cu;
- Nat Mying Gate (Sagaing khua lei in luhnak kutka)
- Min Yekka le Sinzai Gate (Myaung nichuahlei kutka)
- Bo Kyar Thit Gate (Myaung khua thlanglei kutka)
- Chindeih Siangpahrang Gate (Myaung khua nitlaklei kutka) le
- Nhalone Hla Gate (Chindwin tiva in Myaung luhnak kutka) tiin CDSOM nih min a sak hna i a congh dih hna.
Cuka a palmi thilri le minung paoh cu an check dih i Myanmar ralkap cozah company thilri paoh an tlaih viar.
“Mipi ralkap CDSOM cu mipi sinah ziknawh hal le ziknawh cohlan hrimhrim kan duh lo.
“Ralkap chuahmi thilri le ralkap tangka hmuhnak a simi sipuaizi paoh kan kham dih lai.
“Ralkap cozah thilri nan zuarpiak mi le phorhmi kan hmuh cun kan tlaih peng lai. A herh cun a herh ningin hma kan in lak hna lai,” ati.
