Myanmar ralkap cozah biaceihzung nih Australia pa biaceihnak hmun ṭhialpiak dingin a lungtling, tiah Aung San Suu Kyi a sihni pawl nih an chim.
Australia pa cu Aung San Suu Kyi acozah sipuaizi ruahnak petu asi. Min Aung Hlaing le a miṭhi nih uknak an fir lio ah an tlaih vemi asi.
Australia pa Sean Turnell cu Yangon biaceihzung in Naypyitaw biaceihzung ah ṭhial dingin Myanmar Supreme Court a lungtling. Aung San Suu Kyi he biaceihnak hmun ai khah cang lai caah Aung San Suu Kyi sihni pawl caah rian a fawi deuh lai.
Ralkap nih uknak a fir cangka in Suu Kyi le amah ruahnak petu pawl a tlaih hna i tazacuai thluahmahmi hna hi Suu Kyi hi ramkhel tuah kho ti lo dingin kham a duh caah asi lai, tiah zumh asi.
Suu Kyi taza an cuainak tampi lakah ‘Cozah Thlithup Upadi na buar’ ti zong ai tel. Mah upadi cu kum 14 tiang thongthlak khawhnak upadi asi. Suu Kyi cu kum 76 asi cang.
Sean Turnell le adang pawl taza an cuainak hna upadi cu zapi theih in ralkap cozah nih a phuang lo. Myanmar ralkap cozah TV nih a thanhnak ahcun Australia sipuaizi thiamsang pa nih hin ‘cozah thlithup upadi a hmuh tongh ve pinah Myanmar in zaam aa tim’ ati.
Sean Turnell cu Yangon um Insein Thong ah an thlak.
Suu Kyi le a ṭuanhawi 2; President Win Myint le Naypyitaw khuabawi hlun Myo Aung cu nizaan ahkhan Naypyidaw um biaceihzung ah an kong an ceih hna. Tihni ahkhan ceih ding si nain a dam lo ruangah nizaan ah an ceih. ‘Biaceihzung ka ratnak ah ka lungmit, cun kik nih aa ka tlaihmi lo’ ati caah Nikhatni ahkhin ralkap nih thong an thlaknak hmun ah kirnak nawl an pek. An thlaknak hmun cu an phuang duh lo.
