Wednesday, December 1, 2021

Myanmar ralkap: Bogyoke Aung San kha nung rih sehlaw Suu Kyi hi ‘a hrut tak’ ati ko lai

February thla ah mipi thimmi cozah uknak a chuh hnu in, Myanmar ralkap cu a lamkip in harnak a tong. Thla 2 chungah rammi 500 leng a that cangmi ralkap cozah cu rammi thah ti dah lo cu zeihmanh ṭhaṭhi in a tuah khawhmi um lo. Rampumpi ah mipi nih duhlonak fakpi an langhter peng, cozah rianṭuan tampi nih ralkap caah rianṭuan an duh lo. Khua chung ralkap cozah zung tampi mei an duahpiak hna.

Anmah thatnak kong i chim ti zongah, zei an i hlei lo. CNN kha va hal uh!

Myanmar ralkap nih an caah thawngthanhpiak dingin South Korea ah an lakmi CNN thawngla nu Clarissa Ward le a phu cu Yangon an phak hnu ah ralkap sakhan ah an chiah hna i bawi bantukin ralkap mawṭaw in buainak um lonak hmun ah an kalpi hna.

Mah CNN thawngla nu le a phu nih cun ralkap biachimtu Ralbawi Zaw Min Tun cu interview an tuah i “Myanmar ram luatnak paralṭha Ralbawi Aung San kha nung rih sehlaw a fanu hi a hrut tak ati ko lai,” tiah a chim.

CNN thawngla nu Clarissa Ward nih ralkap biachimtu ralbawi Zaw Min Tun cu “Liamcia kum 70 lio ah Myanmar ralkap a dirhtu Ralbawi Aung San nih nihin ram chungah a cangmi hi hmu sehlaw a lungrawk tuk lai ti na ruat maw?” tiah a hal.

“Ralbawi Aung San kaa siter ahcun, ‘ka fanu hi a hrut taktak’ ati ko lai,” tiah ralbawi Zaw Min Tun nih a leh.

CNN thawngla nu nih cun “Ka fanu hi a hrut taktak?” tiah a hal chap. CNN thawngla nu nih aa ruah lo ning deuh in a lehmi khi lo.

A zohchia khunmi cu, thawngla nu nih a hal chapmi cu leh loin ralkap nih Aung San Suu Kyi dohnak ah an hman pengmi British pa a vatmi kha a hung chuahpi.

“Aung San Suu Kyi nih ramdang pa a vatmi zong hi 2008 Phunghram nih a onh lo caah ralbawi Aung San nih a duhpiak lai lo,” tiah a thluamhlaam (indirect) in a chim.

Mah nakin a zohchia deuhmi, a zohchia bikmi um rih.

A halmi he aa pehtlai lo takmi piin a lehmi cu aa lungsak rih rua lo ma zei dek, a hrokhrawl bakin a leh chap.

“Ramdangmi a vami (ṭhimi) cu president ṭuan a ngah lo timi phunghram hi kanmah nih kan sermi asi lo. Ralbawi Aung San hruainak in an rak sermi kum 1947 Phunghram ah a um cangmi si,” tiah a lih hrokhrawl bakin a leh chap – 1947 Phunghram ah president si khawhnak kong cu Article 74 asi i ‘ramdangmi a vami (ṭhimi)’ ti hrimhrim a um lo.

Mah interview video cu Facebook ah mipi nih an hmuh i ralkap biachimtu ralbawi Zaw Min Tun cu an thah deng. “Mihrut timi cu mah ralbawi pa hi asi. Biahaltu nih a halmi he aa pehtlai lo takmi a leh pinah a seihkuzin (a um lomi) 1947 Phunghram tiang a chim” an ti.

- Advertisement -