Myanmar ralkap 4 an thih caah Shan khuate mi thah dih an timh hna i an zaam

March 15 ah, uknak firtu Myanmar ralkap 4 an thih caah Myanmar ralkap nih lehrul cham dingin ralkap tam taktak a thlah hna i khuami 1,500 leng nih nunnak kawl in an inn an zaamtak.

Shan state, Pekon peng ah thlahmi Myanmar ralkap 4 cu mibu nih an kham hna hnu ah cunglei ralkap nih kan pehtlai kho ti hna lo, tiah ralkap cozah nih a thanh.

“Ralkap 4 cu ralbawi 2 le an hnuzul 2 an si. An ruak cu Lelhton khuate pawng khor chungah kan hmuh. Hri in an rak ṭem hna. An mawṭaw cu horkuang ah mei in an rak khanghpiak hna,” tiah ralkap nih a thanh.

Mah ruang cun lehrul cham dingin ralkap tam taktak an thlah hna. Khuami 4 an tlaih hna i adang 4 zong bia an hal hna lio asi.

Ralkap thattu ah aa telmi paoh cu fak taktak in a theipar nan zun lai, tiah ralkap nih an tlerh hna.

March 17 hnu in, Shan state khuate 4 cu ralkap nih an luhhnawh hna i mitthli tlaknak gas, khairiat meithal kuan le kuan taktak in khuami an kah hna.

Ralkap umnak caah khrihfa biakinn 1, sianginn le khuami inn pawl an chuh hna. Shan le Kayah state ramri um khuate 4 cu ralkap nih anmah ta ah an hman cang.

Kan hnu zarh Nilini ahkhan Kayah state ralkap cozah duhlo langhternak hruaitu Ko Khun Myo Hlaing Win le khuami 20 nih “nan tlaihmi khuami pawl hi thlah hna uh” tiin ralkap cu an nawl hna i anmah tu an tlaih ve hna.

Ko Khun Myo Hlaing cu nizaan tihni March 19 ah an thlah ṭhan. “Khuami pawl cu ralkap nih bia an hal hna lio ah lungfim lo le hnachet lak tiangin an tukvelh hna,” tiah a chim.

“Keimah he tlaih ṭimi khuami 20 lakah 18 cu an thlah cang hna,” ati.

Lelton khuate ah ralkap 200 hrawng an thlah hna.

Lelhton, Wari Taung Chay le Saungkan khuami 1,500 hrawng nih nunnak kawl in an inn an zaamtak.

Sagaing ramṭhen, Depayin peng zongah March 17 ahkhan palek 2 an thi i palek bawi pakhat hliam a ton caah ralkap nih khuate 5 ah ralkap tam taktak a thlah hna i khuami thinphang in mitthli he nunnak kawl in an zaam hna.

CNF/A nih atu hin Myanmar ralkap an kah thah awk si maw?

CNF nih Thantlang pengah ralkap an kah hna ahcun an kah hna nak pawngkam khuate vialte le CNA sakhan umnak Tlanglo khua le pawngkam khuate vialte ah ralkap tam taktak an thlah hna lai.

Ralkap nih khuami an hrem, tukvelh, tlaih hna lai. CNF/A he an i kahnak ralram ah thih/nun ri in khuami porter an suai hna lai. Khuami tampi an thi lai. Kan nule le kan farle le ngakchia tampi fak khun in harnak an tong lai. Ni fatin zingzan in khuami vialte lungrethei in an um peng lai.

Thantlang peng khuate mi a thongthong nunnak kawl in ramtang le Mizoram ah an zaam lai. Ramtang ah aa tapmi khuami tampi rawl ei awk le sii-ai loin harnak fak chin an tong lai. Paletwa kan unau bantukin Chin state chung khua kip le ramleng Chinmi vialte nih bawmh an hau lai.

A donghnak ah ho dah sung? Ramchung ramleng Chinmi vialte kan sung dih. Myanmar ralkap 50 hrawng thah i Chin mipi a thongthong harnak ton le hmailei khuasaktintuknak rawk dih tiangin innlo le pawcawmnak sungh dih cu a phu lo.

Cucaah CNF/A nih ralkap an kah rih hna lomi hi hi vialte a chuah lai ding an ruah i a caan za rih lo an ti caah asi kho.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...