23.7 C
Hakha
Thursday, June 24, 2021
- Advertisement -

Ṭial Tharmi

Myanmar Ral a Fah Biknak Paletwa Peng ah Vote Thlaknak an Timhtuah

  • Paletwa pengah vote thlaknak an timhtuah cang
  • Nain, thimnak tuah/lo cu rampumpi cozah biakhiahnak an hngak
  • Thimnak tuah lo ahcun Chinmi kan sung ngai lai
  • Chin state ah MP ṭhutden 39 um
  • Paletwa peng lawngah MP ṭhutden 5 um
  • Chin state ah vote thla kho minung 340,000 kan um

Chin state — A ra laimi thimnak caah, Paletwa peng zongah vote thlaknak kan timhtuah cang, tiah Chin State Thimnak Zung nih a thanh. Paletwa peng cu AA le Cozah Ralkap an i kahnak hmun asi.

“Paletwa pengah Hlutdaw 3 dihlak caah vote thlaknak kan timhtuah cang,” tiah State Thimnak Zung Secretary U Lin Kyaw nih a chim. Hlutdaw 3 a timi cu Amyotha (Hlutdaw Sang), Pyithu (Hlutdaw Niam) le Chin State Hlutdaw a chim duhmi si.

“Vote thlaknak hmun (me kuang) le vote thlaknak caah a herhmi zong kan timh dih cang. Paletwa ah thimnak tuah ding asi ahcun a herhmi paoh timh cia dih si cang,” ati.

Paletwa pengah MP ṭhutden 5 um;

  • Hlutdaw Sang (Amyotha Hlutdaw) 2
  • Chin State Hlutdaw MP ṭhutden 2 le
  • Hlutdaw Niam (Pyithu Hlutdaw) ṭhutden 1. 2015 Thimnak ahcun NLD nih a dihlak in a ngah dih.

AA cu 2009 ahkhan KIA bawmhnak in Kachin state i Laiza khua ah dirhmi asi. 2014 ah kan ram Rakhine state ah kan kir lai tiin thawng a rak thanh.

A hmai kum ah kir cu aa thawh i a ralkap pawl cu Paletwa khua an rak lut. Mah ruangah Cozah Ralkap he an i kap.

AA Chin state an luhka ahcun cozah ralkap he an i kah a tam tuk lo, nain November 2018 in an karlak ral a fak chin lengmang. Tu kum February thla ah fak taktak in an i kap, i Paletwa peng khuami 6,000 leng nih nunnak kawl in an inn an zaamtak.

Kaladan Tiva pawng le Bangladesh ramri zongah an i kap pah lengmang i Chinmi 3,000 leng Paletwa khuapi ah an i dor lio si.

U Lin Kyaw nih, “Paletwa pengah thimnak tuah/lo cu Rampumpi Thimnak Zung (UEC) nih cozah le Runvennak Vuanci Zung sinah ruahnak a hal nain an let rih lo. Paletwa peng thil sining cu ni fatin aa thleng peng ko, nain thimnak tuah ding ti asi ahcun a herhmi vialte kan timh dih cang,” tiah a chim.

2015 Thimnak ahkhan Chin state ah vote thlaknak hmun 159 a um, nain a ra laimi November Thimnak caah 12 an chap i 171 a um lai.

CNLD chairman Pu No Than Kap nih, “Paletwa pengah thimnak tuah ka duh ko. Tuah khawh lo ahcun mipi an sung lai. Mah ruang cun, mipi nih vote an thlak khawhnak hnga Ralkap le AA nih raltuk ngol hna seh ti ka duh,” tiah a chim.

Paletwa peng nithlaklei ah fak tukin an i kap. Kahin MP ṭhutden 3 a um — Amyotha, Pyithu le State Hlutdaw MP pakhat cio.

Paletwa peng ahhin ralkap an tamtuk rih, cozah ralkap nih Kalandan Tiva tilawng lam an phih. Matupi lei kalnak mawṭaw lam zong an phih.

Paletwa khuami Ko David nih, “Thimnak tuah hna seh ti ka duh. An tuah lo ahcun Hlutdaw ah kan peng aiawh biachimtu ding an um lai lo. Thimnak tuah lo cun, kan awaan a tlau lai i vote thlaknak nawl kan ngeihmi zong a tlau lai. Mah ruang cun, kan pengah thimnak an tuah khawh ve nakhnga kap 2 nih raltuk ngol hna seh ti ka duh,” tiah a chim.

Chin state ahhin peng 9 a um i MP ṭhutden 39 a um;

  • Hlutdaw Niam (Pyithu Hlutdaw) MP ṭhutden 9
  • Hlutdaw Sang (Amyotha) 12 le
  • Chin State Hlutdaw ṭhutden 18 an um.

Chin state pumpi ah vote thla kho minung 340,000 an um. Nain, Paletwa peng ah zeizat dah an um ti balte hngalh asi rih lo, 2015 Thimnak ahcun 60,000 fai an rak um. — Irrawaddy English

- Advertisement -

Ṭial Tharmi

Falam ah COVID-19 in minung 1 a thi chap

Zahan zaan suimilam 8 hrawngah Matubuk sang um Salai Lal Tha Eng, kum 25 cu COVID-19 zawtnak in an inn ah a nunnak liam....

COVID-19 ruangah kharmi Paletwa sianginn an on ṭhan cang hna

Chin state, Paletwa peng sianginn pawl cu COVID-19 zawtnak an hmuh caah an khar hna nain tuni June 23 ah an on ṭhan cang...

Malaysia rammi nih ‘refugee hi hmun dangah umter hna uh’ tiin cozah an hal

Malaysia Ramchung Vuanci Pu Hamzah Zainudin nih, "UNHCR card aa tlaihmi pawl hi hmun dangte ah anmah lawngin umter hna uh tiin kan rammi...
- Advertisement -

CRC Malaysia: Covid Raikham Sii Chunhnak Minpeknak Theihternak

Malaysia um Chin miphun hawikom dawt hna Covid raikham sii chunhnak kong he pehtlai in theither kan in duhmi hna cu nan mah le...

UN Thawngthanh: Malaysia Refugee pawl COVID-19 raikhamsi chunh dingin min pek khawh asi cang

Malaysia um ralzaam le ralzaam-soktu pawl cu COVID-19 raikhamsi i chun dingin min cazin pek khawh asi cang. Raikhamsi chunh a duhmi paoh cu Malaysia...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -