January 6 (nizaan) ah Yangon khua chung um inn pakhat ah tlaihkhihnak kan tuah i Rohingya 100 dengmang kan tlaih hna, tiah Myanmar palek nih an chim.
Shwe Pyi Thar Township ah Rohingya pa 25 le nu 73 (dihlak 98) an tlaih hna hi a si.
January 6, zingka sml 10am hrawng ah Shwe Pyi Thar Township, No.8 sang i bayint naung lam cungah palek le lahwahkah nih lunghrinhmi pa pakhat an check i Rohingya miphun a si an hngalh.
Cucaah, thuk deuh in hlathleinak an tuah tikah a thli tein Yangon khua a rak lutmi Rohingya dang zong an um ti an theih caah zaanlei sml 1pm hrawng ah tlaih khihnak an tuah.
Shwe Pyi Thar Township, No. 2 sang ah a ummi inn pakhat ah Rohingya pa 8 le nu 10 an tlaih hna.
Cun, No. 3 sang ah a ummi inn pakhat ah Rohingya pa 17 le nu 63 an tlaih chap hna.
Rakhine state ah a ummi Rohingya pawl cu Myanmar ramchung hmundang an tlawn ahhin phungninglo khualtlawng in palek nih an tlaih hna i dan an tat tawn hna.
“Thil sining kan hlat lio pi a si. An dihlak in Covid-19 vennak caah quarantine center ah chiah an si lai,” tiah Shwe Pyi Thar Township palek bawi Tin Maung Lwin nih a chim.
