Myanmar pa nih ‘Malaysia ah ka umter rih ko uh’ tiin cozah a nawl

- Advertisement -

A visa thih ruangah April 21 hlan ah tlun a haumi Myanmar pa nih, “Zaangfahnak tein ka kirter rih hlah uh, ka umter rih ko uh,” tiin Malaysia cozah Lahwahkah Zung a nawl, tiah Malaysia thawngzamh Free Malaysia Today nih a thanh.

Min langhter a duh lomi kum 24 Myanmar pa nih, “Malaysia rammi ka nungaknu tlawng dingin ni kum March 1 ah ka ra, nain COVID-19 pulrai ruangah vanlawng um lo i atutiang ka kir kho lo,” tiah a chim.

Pulrai ruangah Malaysia cozah nih ramdang zuang vanlawng a rak phih dih, nain atu cu tlawmte a on cang.

Sinain, February 1 ah Myanmar ralkap nih mipi thimmi cozah uknak a chuh hnu in mipi a thah lengmang hna. Mipi 700 leng ralkap nih a thah cang hna. 3,000 leng a tlaih cang hna.

Myanmar pa apa cu Malaysia ah rianṭuanmi asi caah amah cu Malaysia ah a ṭhanglianmi si. “Kum 2018 ah ka pa a rian in pension a la, mah tiang cu Malaysia ah kan chungkhar ningin kan um. Ka pa cu Malaysia ah kum 10 chung um khawhnak visa Malaysia My Second Home a ngahmi si,” tiah a chim.

“Kir ka duh hmanh ah, Myanmar airports vialte an khar dih caah kir khawh si lo. Cun, atu kir cu a him lo tuk caah ka ngamh lo rengreng.

“Malaysia Lahwahkah nih hmai kum tiang ka visa tatṭan ṭu nak nawl ka pe sehlaw ka lawm tuk ko hnga. Tangka cu a herh zat paoh ka liam ko lai,” ati.

Nikhatni ahkhan, Malaysia Lahwahkah Zung nih, “Pulrai chungah a visa tatṭan dihmi ramdangmi vialte April 21 hlan ah nan ram cio ah kir dih uh, mah lo cun tlaih le tangka dantat nan si lai,” tiah thawng a thanh.

Sinain, Lahwahkah bawizik Pu Khairul Dzaimee Daud nih, “Khualtlawn ngah lo ruangah a kir kho lomi cu caankarlak um rih dingin sok a ngah ko,” tiah a chim.

Myanmar pa nih, “Ni kum March 25 ahkhan ka visa a thi cang, nain pulrai ruangah vanlawng um lo i ka tlung kho lo.

“Myanmar ralkap nih uknak an chuh hlan ah, Lahwahkah Zung ka chawnh i ‘phungninglo ramdangmi kirnak program ah min pe law RM500 na liam lai i na tlung kho ko lai’ an ka ti.

“Mah lio khan cun piahtana um lo tein ka rak tlung kho ko hnga. Mah program cu June 30 tiang sok khawh asi, nain nizaan tihni ah Lahwahkah Zung nih April 21 hlan ah tlung dih uh ati cang tikah mah program cu sok ka ngah ti lai maw kai fiang ti lo.

“Lahwahkah Zung ka chawnh hna nain, Myanmar boruak kong ka chimmi an ngai duh lo. Mah program kha sok law tlung ko an ka ti. Ka chawnh hna lio zong cu April 21 hlan ah tlung dih uh an ti hlan deuh ah si,” ati.

Kan hnu zarhdongh zongah Myanmar ralkap nih Bago ah mipi 80 leng an thah hna.

UN Nuhrin Covo lutlai Pi Bachelet nih, “Myanmar buainak hi Syria bantukin buainak fak taktak ah aa chuah kho,” tiah ralrin peknak bia a chim.

“Ramdang nih Syria buainak an rak tlangtlak lo ruangah minung ting tampi an thihmi hi Myanmar ram ah nolhter ding asi lo, atu hin ramdang nih a rannak in hma an lak hau,” ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...