Myanmar nih ‘thlithup case’ in Reuters thawngla 2 kum 7 thongthla

Myanmar nih 'thlithup case' in Reuters thawngla 2 kum 7 thongthla

YANGON: Rakhine state i Rohingya muslim thahnawnnak kong a hlattu Reuters thawngla Kawlrammi 2 cu nizaan ah biaceihzung nih kum 7 thong a thlak hna.

Wa Lone, kum 32 le Kyaw Soe Oo, kum 28 hna cu ni kum December thla ah an rak tlaih hna i aa-mahkhan piaknak nawl pek loin Yangon um Insein thonginn ah an hren peng hna hnu, nizaan biaceihzung nih kum 7 thongthlak hna dingin bia a khiah.

‘Cozah thlithup thil nan ngeih’ tiin taza an cuai hna i biaceihzung ah voi tampi an chuahpi hna. A saubik kum 14 thongthlak khawhnak upadi a si nain kum 7 thong daan an pek hna.

An thawngpang nih vawlei a hninh. ‘Rohingya muslim intuarnak kong mi nih thei kho hna hlah seh tiin Myanmar nih thawngla thong a thlak hna…’ tiah ramkip an zai.

Rakhine state ah Myanmar ralkap nih Rohingya muslim pawl an hrem, tlaihhrem, thah i inn an khanghpiak hna ruangah minung 700,000 leng Bangladesh ah an zaam.

Thawngla pahnih nih, “taza a kan cuaimi hi a dik lo, cozah thlithup thil kan ngei lo. Ni kum December thla ah Inn Din khua i Rohingya muslims 10 thihnak kong kan phuan lio ahkhan palek nih rap a kan chiahpiakmi a si, anmah nih an ttawn chommi lawngte si..” an ti.

“Yangon ah palek nih zaanriah ei a kan sawm i catlap tlawmpal a kan pek. Rawldawr in kan chuah cangka in ‘cozah thlithup catlap nan i ngeih’ tiin a kan tlaih,” an ti.

Biaceihtu Ye Lwin nih, “misual 2 nih hin cozah thangchiat an timh. Thlithup upadi an buar. Kum 7 veve thongthlak si hna seh,” tiah Yangon biaceihzung ah bia a khiah.

Kawlrammi 2 hna cu thonginn ah kalpi dingin kutkhih he motor lei ah an hruai hna lio ah, ‘mi lung a su ngaimi bia’ thawngla pawl sinah bia an chim.

“Cozah nih thonginn chungah na kan hren khawh ko nain… mipi mit le hna cu phit hlah uh,” tiah Kyaw Soe Oo nih a chim.

Wa Lone nih, “biakhiahmi cu lungdai tein le ralttha tein kan in ko lai,” tiah a chim.

An sihni Khin Maung Zaw nih, “a ran khawh chungin nawlnak ca kan ap colh lai,” a ti.

“Nihin cu Myanmar caah ngaihchiat ni a si… cun vawlei kil 4 thawngla vialte caah ngaihchiat ni a si,” tiah Stephen J. Adler, Reuters Editor-in-Chief nih a chim.

“Hihi cozah nih timh ciammaam tein an ttawnmi a si, thawngla pawl kaa phihnak caah le media serhsatnak caah an tuahmi si,” a ti.¬†–REUTERS

Leave a Reply

Your email address will not be published. Required fields are marked *