Myanmar Ramleng Vuanci Zung nih, “ramleng in Covid-19 zawtnak a luhnak hnga lo le kan ram chungah zawtnak karh kan kham khawhnak hnga ramkip khualtlawng kan phih chungmi cu May 15 tian kan sauh,” tiah tuni ah a thanh.

March thla dongh lai in April 30 tiang a rak phihmi kha tuni ah May 15 tiang a sauhmi si.

Myanmar tlawnnak visa vialte a phih dih.

Ramdang tanzung le Myanmar um UN zung rianṭuan pawl, le Myanmar rammi pawl cu luhnak nawl a pek ko hna nain, ni 28 chung anmah dang tein a chiah (quarantine) hna lai.

Hmasa ahcun ni 14 chung quarantine a tuah hna nain, Ngandamnak le Zaanglek Vuanci Zung nih ‘ni 14 cu a tlawm tuk’ ati caah ni 28 chung a tuah cang hna lai. Ni 21 cu cozah thimmi hmun pawl ah anmah dang tein chiah an si lai, a taangmi ni 7 cu an inn ah lengchuak loin umter an si lai.

Atutiang ah Myanmar ram ah Covid-19 zawtnak ngei 146 an hmuh cang hna. Mah chungah 5 an thi i 9 an dam cang.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...