Rakhine state in Bangladesh ah a zaammi Rohingya pawl cu hmai zarh ah Myanmar le Bangladesh cozah nih Myanmar ram ah kirter an timh tthan hna.
August 2017 ah Rohingya ralhrang nih ralkap le palek an thah hna ruangah ralkap nih a lehrulh hna i Rohingya mipi 730,000 leng Bangladesh ram ah an zaam.
Bangladesh cozah nih Rohingya min 22,000 leng Myanmar cozah sinah a ap i 3,540 cu Myanmar cozah nih lak dingin a fehter cang, tiah ram 2 cozah nih Reuters thawngla sinah an chim.
“Rohingya 3,540 cu August 22 ah Myanmar ram kirter dingin lungtlinnak kan ngei,” tiah Myanmar Ramdang Vuanci Zung biachimtu Myint Thu nih a chim.
Bangladesh cozah rengsang pakhat nih, “hmai zarh ah kirter timhmi cu tlawmte lawng an si, an duh lo ahcun hohmanh kan hnek hna lai lo” tiah a chim ve.
“Kir a duhmi lawng kirter ding, an kir tikah him tein le limhang ngei tein an um khawh ding lawng hi Bangladesh nih kan duhmi asi,” tiah a chimchap.
Rohingya thongsawm tampi cu Rakhine state chung camp tampi ah hren an tong peng rih. Rammi sinak an pe hna lo i ramchung khualtlawnnak nawl zong an pe hna lo.
Bangladesh phan Rohingya pawl cu ni kum November thla zongah kirter an rak timh cang hna nain Rohingya pawl nih an duh lo caah an kirter kho hna lo. Hmai zarh zong cu zei dek a lawhte hnga.
