Japan company ‘Fujifilm Toyama Chemical’ nih a sermi cumpi tlangrai sii ‘Avigan’ cu Myanmar telh in ram 38 nih Covid-19 mizaw thlopnak caah an hneksak lai.

ASEAN ram ahcun Myanmar, Malaysia, Philippines le Indonesia nih an hneksak lai.

Japan Ramleng Vuanci Toshimitsu Motegi nih, “Avigan sii cu Covid-19 mizaw thlopnak caah hneksak dingin ram 38 ah free in tu zarh ah kan kuat hna lai,” tiah a thanh.

“Mah sii hi Covid-19 zawtnak a ngei kami, a zual tuk rih lomi thlopnak caah a ṭha ngai.

“Covid-19 mizaw thlopnak caah rinhtlak asi tak/lo ram 38 kan kuat hna lai i kan hneksak ṭi lai.

“A herh vemi ram pawl cawkpiak le kuatnak caah Japan cozah nih UN sinah US$ 1 million kan hlut lai,” ati.

“Favipiravir” ti zongin auhmi Avigan sii cu China cozah zong nih a hneksak.

China Ngandamnak Vuanci Zung rianṭuan Zhang Xinmin nih, “favipiravir sii cu Wuhan le Shenzhen ah Covid-19 mizaw 340 sinah kan hneksak i a result ṭha ngai,” tiah a chim.

“Mah sii hi ṭihnung fawnlo, a him tuk i mizaw thlopnak caah a ṭha ngai,” ati.

“Shenzhen ah mah sii pekmi mizaw pawl cu buaktlak in ni 4 hnu ah an dam. Sii pek lomi mizaw pawl cu anmah tein ni 11 hnu ah an dam,” tiah Japan media NHK nih a chim ve.

Covid-19 zawtnak a ngeimi mino pawl cu an pum chung zawtnak rungrul dotu nih a tei caah sii pek lo zongah amah tein ni 11 hnu ah a dammi an tampi.

Japan sibawi pawl zong nih Covid-19 mizaw 80 sinah an hman ve.

Japan Ngandamnak Vuanci Zung nih, “mah sii hi a zual tuk cangmi pawl caah cun san a tlai theng lo,” tiah a chim.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...